Monthly Archives: April 2017

ஸ்ரீவைஷ்ணவம் – பால பாடம் – ராமானுஜர் – பகுதி – 2

ஸ்ரீ: ஸ்ரீமதே சடகோபாய நம: ஸ்ரீமதே ராமானுஜாய நம: ஸ்ரீமத் வரவரமுநயே நம:

ஸ்ரீவைஷ்ணவம் – பால பாடம்

<< ராமானுஜர் – பகுதி – 1

பராசரன், வ்யாசன் இருவரும், வேதவல்லியுடனும் அத்துழாயுடன் ஆண்டாள் பாட்டியின் வீட்டில் நுழைகிறார்கள்.

பராசர : பாட்டி, ராமானுஜருடைய வாழ்கையைப் பற்றியும், அவருடைய அனைத்து சிஷ்யர்களைப் பற்றியும் சொல்வதாக நேற்று சொன்னீர்களே.

பாட்டி: ஆமாம். அவருடைய சிஷ்யர்களைப் பற்றிச் சொல்வதற்கு முன்னால் ராமானுஜர் கொண்டிருந்த ஒரு மிகச் சிறந்த அம்சத்தைப் பற்றியும் நாம் தெரிந்து கொள்ள வேண்டும். அது என்னவென்றால், அவருடைய தோற்றத்திற்கு முன்னால், அவருடைய அவதாரத்தைப் பற்றி சுமார் 5000 ஆண்டுகளுக்கு முன்னாலேயே, நம்மாழ்வார் மதுரகவியாழ்வாருக்கு முன்னறிவித்து விட்டார்; அதனை நாதமுனிகளுக்கும் முன்னறிவித்தார். சரமோபாய நிர்ணயம் என்ற ஒரு சிறந்த க்ரந்தம் உண்டு; அது எம்பெருமானாரின் மேன்மைகளை முழுமையாக உரைக்கும் – இதில் நம்மாழ்வாருக்கும் – நாதமுனிகளுக்கும் இடையே எம்பெருமானாரின் அவதாரம் குறித்து நடந்த உரையாடலைப் பதிவு செய்யும். நம்மாழ்வார் மதுரகவியாழ்வாருக்கு அளித்த எம்பெருமானாரின் திவ்ய திருமேனி இன்றும் ஆழ்வார்திருநகரியில்,  பவிஷ்யதாசார்யன்  சன்னிதியில் இன்றளவும் ஆராதிக்கப்பட்டு வருகிறது.

ராமானுஜர் – ஆழ்வார்திருநகரி

வ்யாச : ஆஹா! அப்படியானால், ஆழ்வாரும் சில ஆசார்யர்களும் அவருடைய அவதாரத்தைப் பற்றி முன்பே அறிந்திருந்தனர். எவ்வளவு ஆச்சர்யம் பாட்டி. அவருடைய வாழ்க்கையைக் குறித்து மேலும் சொல்லுங்கள்.

பாட்டி: ஆமாம், ராமானுஜர் வைஷ்ணவ சித்தாந்தத்தை நம் தேசத்தின் பல மூலை முடுக்குகளிலும் பிரசாரம் செய்தார். அதில் அவருக்கு பல இடங்களில் எதிர்ப்பு இருந்தது; சில இடங்களில் ஆதரவும் இருந்தது. ராமானுஜர் தம் அன்பினாலும் ஞானத்தினாலும் அனைத்து மக்களையும் ஈர்த்தார். அவர் காஞ்சிபுரத்தில் இருந்த பொழுது, அவருக்கு தஞ்சம்மாளுடன் விவாகம் நடைபெற்றது, பிறகு அவர் தேவப் பெருமாளிடம் ஸந்யாஸாச்ரமம் பெற்றார், அப்பொழுது அவர் தன்னுடைய  மருமகனான முதலியாண்டானைத் தவிர அனைத்து உடைமைகளையும் விடுவதாக உறுதி பூண்டார்.

வ்யாச: பாட்டி, அவர் ஏன் விவாகம் செய்து கொண்டபின் ஸந்யாஸாச்ரமம் மேற்கொள்ள வேண்டும்? அவர் க்ருஹஸ்தராக இருந்து கொண்டே அவருடைய அனைத்து கைங்கர்யங்களையும் செய்திருக்கலாமே?

பாட்டி : வ்யாசா, அதற்குப் பல காரணங்கள் இருந்தன. முதலானது, அவருக்கும் அவருடைய மனைவிக்கும் சில கருத்து வேறுபாடுகள் இருந்தன. இரண்டாவது, ஒரு மேன்மையான நோக்கம் உனக்கு இருக்குமானால் சில தியாகங்களை செய்யத்தான் வேண்டும். வைஷ்ணவ சித்தாந்தத்தை நம் தேசத்தின் பல மூலை முடுக்குகளிலுள்ள மக்களிடம் அவர் கொண்டு சென்றார் என்பது நாமெல்லோரும் அறிந்ததுதானே. உதாரணமாக, நம் தேசத்தைக் காவல் காக்கும் உன்னத லட்சியத்திற்காக நம் வீரர்கள், தம் அன்பான உறவினர்களையும் நன்பர்களையும் விட்டு வந்து அப்பணியினை செய்கிறார்கள் அல்லவா? அது போலத்தான், ராமானுஜர் தம் மனதில் ஒரு சிறந்த நோக்கத்தைக் கொண்டிருந்தார். வேதங்களின் உட்கருத்தை வெளிப்படுத்துதலே தம் நோக்கம்  என்பதனை அவர் நன்றாக அறிந்திருந்தார்.  அதனால் அவர் ஸந்யாஸம் பெற்றுக் கொண்டார். அவர் ஜீயராக ஆனவுடனேயே, சிறந்த பண்டிதர்களாண முதலியாண்டானும் கூரத்தாழ்வானும் ராமானுஜருக்கு சிஷ்யர்களானார்கள்.

அத்துழாய் : அவ்வளவு பெரிய பொறுப்பு ஒரு சுமை தானே? ராமானுஜர் தனியாக எப்படி அதனை நிறைவேற்றினார்?

பாட்டி : இல்லை அத்துழாய்! அது ஒரு சுமையே அன்று. உன்னுடைய பணியில் ஆர்வம் மிகுந்து இருந்தால் அது உனக்கு ஒரு சுமையாகத் தோன்றாது. மேலும், ராமானுஜர் எக்காலத்திலும் தனியாக இல்லை அவர் எக்காலத்திலும் அவருடைய சிறந்த சிஷ்யர்களான, முதலியாண்டான், கூரத்தாழ்வான், எம்பார், அனந்தாழ்வான், கிடம்பியாச்சான், வடுக நம்பி, பிள்ளை உறங்காவில்லிதாசர் போன்றோருடனேயே இருந்தார், அவர்கள் அவரை நாளும் கருத்தாகக் காத்து அவருக்குத் தொன்டு செய்து வந்தனர். அவருடைய லட்சியங்களிற்கான பயணத்தில் அவர்கள் எக்காலத்திலும் அவருடனேயே இருந்தார்கள். அவரைத் தாக்கவும், ஏன் கொல்லவுமே பல முயற்சிகள் அக்காலத்தில் இருந்தன. அது போன்ற சமயங்களில், எம்பார், கூரத்தாழ்வான் போன்றோர் தம் ஆசாரியரைக் காக்கும் பொருட்டு அவர்கள் ஆந்த ஆபத்துகளுக்கு உள்ளானார்கள். சைவ அரசனின் நாட்டிற்கு கூரத்தாழ்வானும் பெரிய நம்பியும் சென்று அவர்களின் கண்களை இழந்ததனை அறிவீர்களல்லவா? அத்தகைய சிறந்த சிஷ்யர்கள் சூழ இருந்த ராமானுஜரும் பல கோயில்களில் நிர்வாக சீர்திருத்தம் செய்யும் பணியை சிறப்பாக நடத்தினார்.

Ramanujar-srirangam

ராமானுஜர் – ஸ்ரீரங்கம் 

வேதவல்லி : ஆமாம் பாட்டி, ஸ்ரீரங்கம், திருப்பதி போன்ற கோயில்களின் நிர்வாகம், சட்ட திட்டங்கள், வழக்கங்களெல்லாம் ராமானுஜரால் நிறுவப்பட்டவை என்று நான் கேட்டிருக்கிறேன். அதனைப் பற்றி எங்களுக்குச் சொல்கிறீர்களா?

பாட்டி : அது சரிதான் வேதவல்லி. வேதங்களில் சொல்லப்பட்ட வழக்கங்களை எல்லாம் அவர் நிலைநாட்டினார். அவர் மிகுந்த கவனத்தோடு இந்தத் திட்டங்களை நிறுவி, அவ்வனைத்தும் சரிவர நடைபெறும் வண்ணம் செய்தார். ஸ்ரீரங்கம் கோயிலுக்கு அதிகாரியாக இருந்தவர் பெரிய கோயில் நம்பி என்னும் ஒருவர். நான் முன்னே சொன்னது போல, கோயில் நிர்வாகத்தில் அவர் செய்ய விரும்பிய மாற்றங்களைச் செயல்படுத்த அவருக்கு பெரிய கோயில் நம்பி சுலபத்தில் அனுமதித்து விடவில்லை. அதனால்  பெரிய கோயில் நம்பியை ஸ்ரீவைஷ்ணவ தர்மத்தில் கொண்டு வரவும் அவருக்கு அதற்கான வழியினை காட்டவும் ராமானுஜர் கூரத்தாழ்வானை அனுப்பி வைத்தார். பெரிய கோயில் நம்பியும் ஆழ்வானின் வழிகாட்டுதலினால், ராமானுஜரிடம் சரணடைந்தார், பிற்காலத்தில் திருவரங்கத்தமுதனார் என்று அழைக்கப்பட்டார். அவர் பிற்காலத்தில் ராமானுஜரைப் போற்றி இராமானுச நூற்றந்தாதியினை இயற்றினார். திருவேங்கடமுடையானை வேறு விதமாக இதர பிரிவினர்கள் கூறி வந்தனர் என்பதனையும் அவர் விஷ்ணுவே என்ற அடையாளத்தை அவருக்கு ஏற்படுத்தியவர் ராமானுஜர்தாம் என்றும் தெரியுமா?

ramanujar-tirupathi

ராமானுஜர் – திருமலை

பராசர : என்ன? நாம் எல்லோரும் திருவேங்கடமுடையான் ஸ்ரீமஹாவிஷ்ணுவேதான் என்றுதான் அறிவோமே? எப்பொழுது இதில் அவர்களுக்கு சந்தேகம் ஏற்பட்டது?

பாட்டி : ஆம்! திருவேங்கடமுடையான் மஹாவிஷ்ணுவேதான்.  ஆனால், அதற்கு மாறாக கூறிக்கொண்டிருந்தவர்கள் சிலரும் இருந்தனர். சிலர் அவரை ருத்ரன் என்றும் வேறு சிலர் அவர் ஸ்கந்தனின் ரூபம் என்றும் கூறிக்கொண்டிருந்தனர். இதனைச் செவியுற்ற ராமானுஜர் திருப்பதிக்குச் சென்றார். அதில் அவருக்கு மிகவும் வருத்தம். அங்கே  சென்று திருவேங்கடமுடையானுடைய சங்கத்தையும் சக்கரத்தையும் அடையாளப்படுத்தி அவரை நிலைநாட்டினார். ஆக, திருப்பதியில் ராமானுஜர் கோயில் நிர்வாகம் மாத்திரமன்றி வேறு சில கைங்கர்யங்களையும் செய்தார். இதனாலேயே ராமானுஜரைத் திருவேங்கடமுடையானுடடை ஆசாரியர் என்று கொண்டாடுவார்கள்.  அங்கேதான், ராமானுஜர் ராமாயணத்தின் சாரத்தை அவருடைய மாமாவான திருமலை நம்பியிடம் கற்றார். இதற்கு பின்னால் அவர் வேறு பல கோயில்களின் கைங்கர்யங்களை நிறுவினார், அவற்றுள் பிரதானமானது திருநாராயணபுரம் ஆகும்.

ராமானுஜர் – திருநாராயணபுரம்

அத்துழாய் : பாட்டி, அக்காலத்தில் மேல்கோட்டையில் இருந்த ஜைனர்கள் ராமானுஜருக்கு ஊறு செய்தார்கள் என்று நான் கேட்டிருக்கிறேன் பாட்டி.

வ்யாச : நான்கூட திருநாராயணபுரத்து பெருமாளை துலுக்கர்கள் படையெடுத்து கவர்ந்து சென்று விட்டார்கள் என்று கேள்விப்பட்டிருக்கிறேன்.

பாட்டி : ஆம், அது உண்மைதான். கோயில்களின் மேம்பாட்டிற்கும் நம் சம்பிரதாயத்தின் மேன்மைக்கும் அவர் பல சீர்த்திருத்தங்களை செய்யும் பணியில் ராமானுஜர் பல இன்னல்களை நேர்கொண்டார். மாற்றம் என்பதனை பலரும் விரும்பி ஏற்பதில்லையே. எல்லோரும் தம்முடைய வழிமுறைகளில் பழகிவிடுவதால், அது சரியானாலும் தவறானாலும், அதற்கான மாற்றங்களையோ மாற்றம் செய்ய முன்வரும் நபரையோ, அவர்கள் ஏற்பதில்லை. இது நம் சமுதாயத்தின் பொதுவான அணுகுமுறைதான். இன்றைய நாளில் கூட மாற்றம் என்பது கடினமே, என்றால், 1000 ஆண்டுகுளுக்கு முன்பு இருந்த திடமான நம்பிக்கைகளையும் பழக்கவழக்கங்களையும் எண்ணிப் பார்த்துக் கொள்ளுங்கள், ராமானுஜர் அதற்கான மாற்றங்களை செய்ய, பலத்த எதிர்ப்பை சந்திக்க வேண்டியிருந்தது. விசிஷ்டாத்வைத சித்தாந்தத்தின் நித்யமான உண்மையை ஜைன பண்டிதர்கள் ஏற்கத் தயங்கினார்கள். ஒரே சமயத்தில் 1000 ஜைன பண்டிதர்களோடு வாதிடுமாறு ராமானுஜருக்கு சவாலை முன்வைத்தார்கள்.  ராமானுஜர் தம்முடைய உண்மை ஸ்வரூபமான 1000 தலைகளைக் கொண்ட ஆதிசேஷனுடைய  ஸ்வரூபத்தை எடுத்துக் கொண்டு ஒரே நேரத்தில் அவர்களுடைய கேள்விகள் அனைத்திற்கும் விடை சொல்லி, அவர்களை வாதத்தில் வென்றார்.

திருநாராயணபுரம் கோயில் உத்சவமூர்த்தியான செல்வப்பிள்ளைப் பெருமாளை துலுக்கர்களின் படையெடுப்பின்போது கவர்ந்து சென்று விட்டனர்; செல்வப்பிள்ளைப் பெருமாளை படையெடுத்த அரசனுடைய மகளின் அந்தப்புரத்தில் அவள் மிகுந்த அன்போடும் பரிவுடனும் கொண்டாடி வந்தாள். ராமானுஜர் செல்வப்பிள்ளையை மீட்டுச் செல்ல வந்த பொழுது, அவருடைய பிரிவினை அவளால் தாங்க இயலவில்லை.

அத்துழாய் : இது ஆண்டாள் கிருஷ்ணருடைய பிரிவினை தாங்க மாட்டாமல் இருந்தது போல்தானா!

பாட்டி : ஆமாம், ஆண்டாளைப் போலவேதான். அந்த மன்னனுடைய மகளுக்கு செல்வப்பிள்ளையை ராமானுஜருடன் அனுப்பி வைக்கும் எண்ணமே தாங்கமாட்டாததாக இருந்தது. இறுதியில் ராமானுஜர், அரசனுடைய மகளுக்கும் செல்வப்பிள்ளைக்கும் விவாகம் செய்து வைத்தார். இது பெருமாளின் மேல் உண்மையான பக்தியும் அன்பும் கொள்வது மதத்திற்கும் குலத்திற்கும் அப்பாற்பட்டது என்பதனை மறுபடியும் நமக்குக் காட்டிக் கொடுக்கிறது.

kurathazhwan-ramanujar-mudhaliyandan

கூரத்தாழ்வான் – ராமானுஜர் – முதலியாண்டான்

வ்யாச : பாட்டி, ராமானுஜர் எவ்வாறு ஆளவந்தாருடைய மூன்று ஆசைகளை நிறைவேற்றினார் என்று நீங்கள் எங்களுக்குச் சொல்லவே இல்லையே.

பாட்டி : கூரத்தாழ்வான் இரண்டு குழந்தைகளால் அனுக்கிரஹிக்கப்பட்டார். ராமானுஜர் அவரின் இரண்டு புதல்வர்களுக்கும் வியாசன் என்றும் பராசரன் என்றும் பெயரிட்டு அவ்விரு ரிஷிகளின் மேன்மைக்கு அடையாளப்படுத்தினார், இதன் மூலம் அவர் ஆளவந்தாரிடத்தில் தாம் செய்த முதல் ப்ரதிக்ஞையை நிறைவேற்றினார். பிற்காலத்தில் எம்பார் என்று வழங்கப்பட்ட கோவிந்த பட்டருக்குச் சிறிய கோவிந்த பட்டர் என்று ஓர் இளைய தம்பி இருந்தார், அவருடைய புதல்வருக்கு பராங்குசநம்பி என்ற நம்மாழ்வாரின் அடையாளப் பெயரிட்டார்; இதன் மூலம் இரண்டாவது ப்ரதிக்ஞை நிறைவேறியது. இறுதியாக, அவர் மூன்றாம் ப்ரதிக்ஞையை ஸ்ரீபாஷ்யம் இயற்றியதன் மூலம் நிறைவேற்றினார். ஸ்ரீபாஷ்யத்தை இயற்றுவதற்காக ராமானுஜர், காஷ்மீரத்திற்கு கூரத்தாழ்வானுடன் பயணப்பட்டார்.

வேதவல்லி : காஷ்மீரத்தில் என்ன நடந்தது?

பாட்டி : ராமானுஜர், ஸ்ரீபாஷ்யம் இயற்றுவதுற்குத் தேவையான ஒரு குறிப்பு க்ரந்தத்தைப் (புத்தகத்தை) பெறுவதற்காக கூரத்தாழ்வானுடன் காஷ்மீரத்திற்கு ப்ரயாணமானார். அவர் அந்த க்ரந்தத்தைப் பெற்றபின், தங்களிடம் இருந்த க்ரந்தத்தை ராமானுஜர் தம்முடைய நோக்கத்திற்காகப் பயன்படுத்துவதைப் பொறுக்கமுடியாத சிலர், அவர்களைத் தொடர்ந்து வந்து, அந்தப் புத்தகத்தைப் பறித்துச் சென்றனர்.

வ்யாச : எவ்வளவு கொடுஞ்செயல்!

பாட்டி : ஆமாம்! ஆனால் அவர்கள் அந்த க்ரந்த்தத்தை பெறும் முன்பே ஆழ்வான் அந்த மொத்த க்ரந்தத்தையும் ஸ்ரீபாஷ்யம் எழுதுவதற்குத் தேவையான உட்பொருளையும் மனப்பாடம் செய்து விட்டார்.

வ்யாச : ஒரு மொத்த க்ரந்தத்தையும் மனப்பாடம் செய்துவிட்டாரா? அது எப்படி முடியும் பாட்டி? நான் கூட அப்படி என்னுடைய பாடப் புத்தகங்களை அது போல மனப்பாடம் செய்தால் எப்படி இருக்கும்?

பாட்டி (சிரித்தபடி) : கூரத்தாழ்வான் ராமானுஜருக்கு ஒரு சிஷ்யராக மாத்திரமல்ல, அவர் ராமானுஜருக்கு ஒரு பரிசு போலவும் பெரிய நிதியாகவும் இருந்தார். ராமானுஜருடைய அணுக்கத்தினால் மற்றவர்கள் மேன்மையுற்றனர் என்பது இருக்க, ராமானுஜரே தாம் கூரத்தாழ்வானுடைய அணுக்கத்தினால் தாம் மேன்மையுற்றதாக கூறுவார். அவர் பெரிய பண்டிதராயிருந்தும் கூட, தம் மனதினை ராமானுஜருடைய உறைவிடமாக கொண்டிருந்தவர்; கர்வமோ அகம்பாவமோ என்பது கிஞ்சித்தும் அவர் மனதில் இருந்ததே இல்லை.

கூரத்தாழ்வானின் உதவியுடன், ராமானுஜர் ஸ்ரீபாஷ்யத்தினை இயற்றியதன் மூலம், அவர் ஆளவந்தாரிடம் தாம் இயற்றிய கடைசி ப்ரதிக்ஞையையும் நிறைவேற்றினார். ஸ்ரீரங்கத்தை ஆண்ட சைவ அரசனுடைய இறப்புக்குப் பின், ராமானுஜர் ஸ்ரீரங்கத்திற்குத் திரும்ப வந்து அடைந்தார்.

இறுதியில் இவ்வுலகை விட்டுப் பரமபதத்திற்கு ஏகும் முன், ஆளவந்தாரைப் போலவே, ராமானுஜர் நம் சம்பிரதாயத்தை மேலும் கொண்டு செல்லும் விடிவிளக்காக ஆழ்வானின் போற்றத்தக்க குமாரரான பராசர பட்டரை நிர்ணயித்தார். பட்டருக்கும் பிற சிஷ்யர்களுக்கும் எம்பாரை நாடி எம்பாரிடம் மேலும் உபதேசங்கள் பெறுமாறு பணித்தார்.

பிற சிஷ்யர்களிடம் தம்மிடம் இருப்பது போலவே பட்டரிடத்தினில் நடக்குமாறு பணித்தார். எவ்வாறு ஆளவந்தார் ராமானுஜரை நம் சம்பிரதாயத்திற்குள் கொண்டு வரப் பெரிய நம்பியைப் பணிதாரோ, அதே போல பட்டரிடம் நஞ்சீயரையும் நம் சம்பிரதாயத்திற்குள் கொண்டு வருமாறும் பணித்தார். பின்பு தம் ஆசார்யர்களான பெரிய நம்பியையும் ஆளவந்தாரையும் தியானித்தவாறு ஸ்ரீமன் நாராயணனின் உறைவிடமான பரமபதத்தில் நித்யமான கைங்கர்யங்கள் செய்யும் பொருட்டு இவ்வுலகை நீத்தார். சிறிது காலத்தில் ராமானுஜரின் பிரிவினை தாங்க இயலாமல், எம்பாரும் பரமபதத்திற்கு ஏகினார்.

பராசர : பாட்டி, ராமானுஜரின் தேஹம் இன்றும் ஸ்ரீரங்கதில் பாதுகாக்கப்பட்டு வருகிறது என்று கேள்விப்பட்டிருக்கிறேன். அது நிஜமா?

பாட்டி : ஆமாம் பராசரா, அது உண்மைதான்; நாம் நம்முடைய சிறந்த ஆசார்யர்களைக் குறித்து சொல்லும்பொழுது, எவ்வாறு பெருமாளுக்கு உயர்த்தி சொல்வோமோ, அதே போல திருமேனி என்று சொல்கிறோம். ராமானுஜருடைய சரம திருமேனி ஸ்ரீரங்கம் கோயிலில் அவருடைய சன்னிதியில் அவருடைய அர்ச்சா திருமேனிக்குக் கீழே பாதுகாக்கப்படுகிறது. இப்பொழுது ராமானுஜருடைய சன்னிதியாக நாம் சேவிப்பது முன் காலத்தில் ஸ்ரீரங்கம் ஸ்ரீரங்கநாதருடைய வசந்த மண்டபமாக இருந்தது. இப்பொழுது நாம் ராமானுஜருடைய திருவடித்  தாமரைகளையும் ஸ்ரீரங்கநதனுடைய திருவடித் தாமரைகளையும் நமக்கு நம் ஆசார்யர்களைப் பற்றியும் அவர்களின் மேன்மையை அறிந்து கொள்ளும் ஆர்வத்தைக் கொடுக்க ப்ரார்த்தித்துக் கொள்வோம். நேரமாகிறது, இப்பொழுது நீங்கள் எல்லாரும் புறப்படுங்கள். நாம் அடுத்த முறை சந்திக்கும் பொழுது, நான் உங்களுக்கு ராமானுஜருடைய பல சிஷ்யர்களைப் பற்றியும், அவர்களின் சிறப்பையும், ராமானுஜருடைய திக்விஜயத்தில் அவர்கள் ஆற்றிய தொண்டினைப் பற்றியும் சொல்வேன்.

குழந்தைகள் அனைவரும் ராமானுஜரைப் பற்றியும் அவர் செய்த பல கைங்கர்யங்களையும், அவர் எதிர்கொண்ட பல இன்னல்களையும், அவர் நம் சம்பிரதாயத்தின் சிறந்த ஆசார்யனாக எவ்வாறு வெளிப்பட்டார் என்றும் எண்ணியவாறு புறப்பட்டுச் செல்கின்றனர்.

அடியேன் கீதா ராமானுஜ தாசி

ஆதாரம்:  http://pillai.koyil.org/index.php/2016/08/beginners-guide-ramanujar-2/

வலைத்தளம் – http://pillai.koyil.org/

ப்ரமேயம் (குறிக்கோள்) – http://koyil.org
ப்ரமாணம் (க்ரந்தங்கள்) – http://granthams.koyil.org
ப்ரமாதா (ஆசார்யர்கள்) – http://acharyas.koyil.org
ஸ்ரீவைஷ்ணவக் கல்வி வலைத்தளம் – http://pillai.koyil.org/

ஸ்ரீவைஷ்ணவம் – பால பாடம் – ராமானுஜர் – பகுதி – 1

ஸ்ரீ: ஸ்ரீமதே சடகோபாய நம: ஸ்ரீமதே ராமானுஜாய நம: ஸ்ரீமத் வரவரமுநயே நம:

ஸ்ரீவைஷ்ணவம் – பால பாடம்

<< ஆளவந்தாரின் சிஷ்யர்கள் – 2

பராசரனும், வ்யாசனும், வேதவல்லி, அத்துழாய் இவர்களுடன் ஆண்டாள் பாட்டியின் வீட்டிற்குள் நுழைகிறார்கள்.

பாட்டி : வாருங்கள் குழந்தைகளே. உங்கள் கை கால்களை அலம்பிக் கொள்ளுங்கள். நம் கோயிலில் இன்றைக்கு நடந்த திருவாடிப்புர உத்ஸவப் ப்ரஸாதங்களைப் பெற்றுக் கொள்ளுங்கள். இன்றைக்கு, ஆன்டாள் பிராட்டியின் அன்பிற்குப் பாத்திரமான ஒருவர், அவரைத் தன்னுடைய அண்ணன் என்றே அழைத்தாள், அவரைப் பற்றி பேசலாம். அவர் யாரென்று உங்களால் ஊகிக்க முடிகிறதா ?

வ்யாச : தெரியாதே பாட்டி, ஆண்டாளுடைய அண்ணன் யார்? ஆண்டாள் பிராட்டிக்கு ஓர் அண்ணன் இருந்தாரா?

பாட்டி : ஆமாம், அவர் அவளுக்கு அண்ணனே, உடன் பிறந்ததினால் அல்ல, தம்ம்டைய அன்பினாலும் பாசத்தினாலும். அவரை கோதாக்ரஜர் அல்லது கோயிலண்ணன் என்று அழைப்பார்கள், அவர் வேறு யாருமல்ல நம் ராமானுஜர் தான்! அக்ரஜன் என்ற ஸம்ஸ்க்ருத சொல்லுக்கு தமையன் அல்லது அண்ணன் என்று பொருள். ஆண்டாள் அல்லது கோதையே அண்ணன் என்று கொண்டதால் அவரை கோதாக்ரஜர் என்று அழைப்பார்கள். ஸ்ரீபெரும்பூதூரில் கேசவ தீக்ஷிதருக்கும் காந்திமதி அம்மங்காருக்கும் புதல்வராக இளையாழ்வார் அவதரித்தார். ஆதிஷேஷனின் அவதாரம் தான் அவர். அவர் திருவல்லிக்கேணி பார்த்தசாரதி பெருமாளின் கடாக்ஷத்தினால் தோன்றியவர்.

உடையவர், உபயநாச்சியருடன் பார்த்தசாரதி பெருமாள் – திருவல்லிக்கேணி

பராசரன் : பாட்டி, ஆண்டாள் பிராட்டி ராமானுஜருக்கு வெகு காலம் முன்பே அவதரித்தவள் அல்லவா? அப்படி இருக்க அவர் எப்படி அவளுக்கு அண்ணனாக ஆக முடியும் ?

பாட்டி : நல்ல கேள்வி பராசரா. நான் சொன்னது போல் பிறப்பினால் அவளுக்கு அவர் அண்ணனாக ஆகவில்லை, தன் செயலினால் அவ்வாறாக ஆனார். ஆன்டாள் பெருமாளிடத்தில் கொண்ட தூய அன்பினால், திருமாலிருஞ்சோலை அழகர் பெருமாளுக்கு 100 தடா நிறைந்த அக்கார அடிசிலும் 100 தடா நிறைந்த வெண்ணெயையும் சமர்பிக்க விரும்பினாள். ஆனால் அக்காலத்தில் அவள் சிறிய பெண்ணாக இருந்ததினால் அதனைச் செயல்படுத்த இயலவில்லை. ராமானுஜர் நாச்சியார் திருமொழியில் உள்ள அப்பாசுரத்தை அனுசந்திக்கும் பொழுது ஆண்டாளுக்கு இருந்த ஆசையை உணர்ந்தார்.  ராமானுஜரும் ஆண்டாள் எண்ணிய வண்ணம்  100 தடா நிறைய அக்கார அடிசிலும் 100 தடா நிறைய வெண்ணெயையும் திருமாலிருஞ்சோலை அழகர் பெருமாளுக்கு சமர்ப்பித்தார். அழகருக்கு இவற்றைச் சமர்ப்பித்துவிட்டு, அவர் ஸ்ரீவில்லிபுத்தூருக்குச் சென்றபொழுது, ஆண்டாள் அவரை வரவேற்று அவரைக் கோயில் (ஸ்ரீரங்கத்து) அண்ணன் என்று அழைக்கிறாள். ஆகையினால் தான் அவருக்குக் கோயிலண்ணன் என்று பெயர்.  எப்பொழுதுமே அண்ணன்கள் தாம் தங்கையரின் ஆசைகளையும் விருப்பங்களையும் நிறைவேற்றுவர் இல்லையா, அதனால் தான் ஆண்டாள் அவரை அண்ணன் என்று அழைத்தாள்.

அத்துழாய், திருப்பாவையிலிருந்து எதாவது சில பாசுரங்களை உன்னால் சொல்ல முடியும? நீ உன் பள்ளி மாறுவேடப்போட்டியில் ஆண்டாளாக வேடமிட்டுச் சில பாசுரங்களைச் சொன்னது எனக்கு நினைவுக்கு வருகிறது!

(அத்துழாய் சில பாசுரங்களைச் சொல்கிறாள்)

பாட்டி : இன்று உன்னை ஏன் பாசுரம் சொல்லச் சொன்னேன் தெரியும? ஏனென்றால், ராமானுஜரை  திருப்பாவை ஜீயர் என்றும் அழைப்பார்கள். அவர் எக்காலத்திலும் திருப்பாவையை தினமுமே அனுசந்தித்தவர். அவர் சிறந்த அறிஞருமானதால், ராமானுஜர் மனதுக்கு மிகவும் உகந்த ப்ரபந்தம் திருப்பாவையாகும், அதனால் அவர் அதனை தினமுமே அனுசந்தித்து வந்தார். ஏன் என்று உங்களுக்கு தெரியுமா ?

வேதவல்லி : ஏனென்றால் அது கற்க எளிதானது என்பதனாலா? எனக்கு 30 பாசுரங்களுமே தெரியும்.

பாட்டி (புன்சிரித்தவாறு) : மிக நன்று வேதவல்லி. திருப்பாவை கற்க எளிதானது என்பது மாத்திரமல்ல, நம் சம்பிரதாயத்தின் மொத்த சாரமுமே இந்த 30 பாசுரங்களில் உள்ளடக்கமாகும். நம் வேதங்களில் பரக்கச் சொல்லப்பட்டுள்ள ஞானத்திற்கு நிகரானது இது. அதனால் தான் இதனை “வேதம் அனைத்துக்கும் வித்தாகும்” என்று சொல்கிறோம் – நான்கு வேதக் கருத்துக்களும் இந்த 30 பாசுரங்களில் உள்ளன.

அத்துழாய்: பாட்டி, ராமானுஜருக்குப் பல பெயர்கள் சொல்கிறீர்களே. முன்னால் நீங்கள் இளையாழ்வார் என்றீர்கள், பின்பு ராமானுஜர் என்றீர்கள், இப்பொழுது கோயிலண்ணன், திருப்பாவை ஜீயர் என்கிறீர்கள்!

பாட்டி : ஆமாம். அவர் மீது கொண்ட அன்பினால் அவருக்குப் பல பெயர்களை ஆசார்யர்கள், ஆண்டாள், எம்பெருமான் ஆகியோர் அளித்தனர். நாம் முன்னமேயே, அவருடைய பல ஆசார்யர்களையும், ராமானுஜர் வாழ்வில் அவர்களின் பங்கினையும் கண்டுள்ளோம், இப்பொழுது ராமானுஜரின் பல பெயர்களையும், அதனை அவருக்கு அளித்தவர்களையும் பற்றிப் பார்ப்போம்.

  • இளையாழ்வார் என்பது அவர் பிறந்த பொழுது அவருடைய அம்மான் (மாமா) பெரிய திருமலை நம்பி இட்ட பெயர்.
  • ஸ்ரீ ராமானுஜர் என்பது அவருக்கு மதுராந்தகத்தில் பஞ்ச சம்ஸ்காரம் செய்யும் பொழுது பெரிய நம்பி இட்ட பெயர்.
  • யதிராஜர், ராமானுஜமுனி என்பவை ராமானுஜர் ஸந்யாஸாச்ரமம் மேற்கொள்ளும் பொழுது தேவப்பெருமாள் அளித்த பெயர்கள்.
  • உடையவர் என்பது நம்பெருமாளே அளித்த பெயர்; இதன் பொருள் இரு உலகங்களின் சொத்துக்களுக்கும் ராமானுஜரும் உடையவர் என்று பொருள்.
  • லக்ஷ்மணமுனி என்ற பெயரளித்தவர் திருவரங்கப் பெருமாள் அரையர்.
  • தம்மிடம் திருக்கோஷ்டியூரில் சரணடைந்த அனைவர்க்கும் ராமானுஜர் நம் சம்பிரதாயத்தின் பரந்த கருத்துக்களை அளித்தபொழுது அவருக்கு திருக்கோஷ்டியூர் நம்பி அளித்த பெயர் எம்பெருமானார்; ராமானுஜரின் காருண்யத்தினால் ஈர்க்கப்பட்ட திருக்கோஷ்டியூர் நம்பி “நீர் அந்த எம்பெருமானிலும் கருணை பொருந்தியவராகையால் எம்பெருமானார் – எம்பெருமானையுமே காட்டிலும் இரக்கம் மிகுந்தவர்” என்று கூறி அவருக்கு எம்பெருமானார் என்ற பெயரிட்டழைத்தார்.
  • அவருக்குச் சடகோபன் பொன்னடி என்ற பெயரளித்தவர் திருமாலையாண்டான்.
  • ஆண்டாள் அவரை கோயிலண்ணன் என்றழைத்ததை இப்பொழுது நாம் கண்டோம்.
  • ஸ்ரீ பாஷ்யகாரர் என்ற பெயரிட்டவர் காஷ்மீரத்தின் ஸரஸ்வதி தேவி.
  • பூதபுரீசர் என்ற பெயரளித்தவர் ஸ்ரீபெரும்புதூர் ஆதி கேசவப் பெருமாள்.
  • தேசிகேந்த்ரர் என்ற பெயரளித்தவர் வேறு யாருமல்ல; நம்முடைய திருவேங்கடமுடையானே.

ஆக சுருங்கச்சொல்லின், பல ஆசார்யர்கள் அன்போடு ராமானுஜருக்கு நம் சம்பிரதாயத்தின் உயர்ந்த கருத்துக்களை உபதேசித்து ஆளவந்தாருக்குப் பின்பும் நம் சம்பிரதாயம் ராமானுஜர் வாயிலாக செழிக்க வழிவகுத்தனர்.  அவரை ஆளவந்தாரின் எண்ணப்படி முதலில் ஸ்ரீவைஷ்ணவத்தின்பால் ஈர்த்தவர் திருக்கச்சி நம்பி; பிறகு அவருக்கு பஞ்சசம்ஸ்காரம் செய்து உபதேசம் செய்தவர் பெரிய நம்பி; திருவாய்மொழியின் ஆழ்ந்த கருத்துக்களை முழுதுமாக உபதேசித்தவர் திருமாலையாண்டான்; நம் சம்பிரதாயத்தின் சாரத்தைக் கற்றது திருவரங்கப்பெருமாளரையரிடம்; சரம ச்லோகம் கற்றது திருக்கோஷ்டியூர் நம்பியிடம்; இறுதியாக ஸ்ரீ ராமாயணத்தின் முழுக்கருத்துக்களையும் கற்றறிந்தது அவருடைய அம்மானான பெரிய திருமலை நம்பியிடமிருந்து. ஆக, ஆளவந்தாரின் சிறந்த 6 சிஷ்யர்களும் ஆசார்யர் நியமித்த கடமையைச் சரிவரச் சிறப்பாகச் செய்தனர்.

ராமானுஜர் – ஸ்ரீபெரும்புதூர்

வேதவல்லி : பாட்டி, ஆளவந்தாரைப் பற்றி நீங்கள் சொல்லும்பொழுது, ராமானுஜரால் அவருடைய சிஷ்யராக ஆக முடியவில்லை ஆனால் அவருடைய ஆசைகளை நிறைவேற்றுவதாக ஊறுதி கொண்டார் என்று சொன்னீற்கள். அவை என்ன? ஆளவந்தாருக்கு ஆசைகள் இருந்தன என்று  ராமானுஜர் எவ்வாறு அறிந்தார்?

பாட்டி : நல்ல கேள்வி. ராமானுஜரை ஸ்ரீரங்கத்திற்கு அழைத்து வருமாறு ஆளவந்தார் சொல்ல, பெரிய நம்பி காஞ்சிபுரத்திற்குப் புறப்பட்டார். பெரிய நம்பி ராமானுஜருடன் ஸ்ரீரங்கத்திற்கு வந்தடையும் பொழுதோ, அவர் இவ்வுலகை விட்டுப் பரமபதத்திற்குப் புறப்பட்டு விட்டார். ஸ்ரீரங்கத்தை அடைந்த பின்புதான் பெரிய நம்பியும் ராமானுஜரும் அதனைத் தெரிந்து கொண்டனர். ராமானுஜர் ஆளவந்தாருடைய திருமேனியை (திவ்ய உடல்) காணும் பொழுது, அவருடைய ஒரு கரத்தில் மூன்று விரல்கள் மடிந்திருப்பதனைக் கவனித்தார். அது என்னவென்று அவர் கேட்க, ஆளவந்தருடைய சிஷ்யர்கள் அவருடைய ஈடேறாத ஆசைகள் சில இருந்ததனைக் கூறினர். உடன் ராமானுஜர் எடுத்துக் கொண்ட உறுதிகளாவது:

  • வ்யாசர் மற்றும் பராசர ரிஷியினிடத்தில் நம் நன்றியினைத் தம் காலத்தில் நிறுவுதல்.
  • நம்மாழ்வாரிடத்தில் தம் அன்பையும் நன்றியினையும் தம் காலத்தில் வெளிப்படுத்துதல்.
  • வ்யாசரின் ப்ரஹ்ம சூத்திரத்திற்கு ஒரு பாஷ்யம் (உரை) எழுதுதல், ராமானுஜர் தம் பிரதம சிஷ்யரான கூரத்தாழ்வானின் உதவியுடன் எழுதிய இந்த க்ரந்தத்தைதான் ஸ்ரீபாஷ்யம் என்று வழங்குகிறோம். இந்தக் க்ரந்ததத்தை இயற்றுவதற்காகவே அவர் கூரத்தாழ்வானுடன் காஷ்மீரத்திற்கு ப்ரயாணம் மேற்கொண்டார்.

ராமானுஜர் இம்மூன்று உறுதிகளை எடுத்துக்கொண்டவுடனே, ஆளவந்தாருடைய மடிந்திருந்த விரல்கள் நேராகின. இதனைப் பார்த்துக் கொண்டிருந்த அவருடைய சிஷ்யர்கள் வியப்புக்குள்ளாகி நம் சம்பிரதாயத்திற்குக் கிட்டிய அடுத்த ஆசார்யர் என்று ராமானுஜரைப் போற்றினர்.  ஆனால், ஆளவந்தருடைய மறைவுத் துயரில் மூழ்கியிருந்த ராமானுஜரோ ஸ்ரீரங்கநாதனை சேவிக்கக்கூடச் செல்லாமல், உடன் காஞ்சிபுரத்திற்குப் புறப்பட்டார்.

வ்யாச : ஆனால் பாட்டி, ராமானுஜரின் உறுதிகளினால்  ஆளவந்தருடைய விரல்கள் நேராக ஆனது போல நடக்குமா என்ன?

பாட்டி: வ்யாசா, ராமானுஜருக்கும் ஆளவந்தாருக்கும் இருந்த பிணைப்பு இந்த உலகத்தின் உணர்வுகளுக்கு அப்பாற்பட்டது. அவர்கள் மனத்தாலும் ஆத்மாவினாலும் இணைந்திருந்தனர். ஆளவந்தார் ராமானுஜரிடம் தம் மூன்று அவாக்களைச் சொன்னாரா என்ன? இருந்தும் ராமானுஜர் ஆளவந்தாருடைய மூன்று அவாக்களைக் குறித்து உறுதி மேற்கொண்டார். இது எவ்வாறு நடக்கும்? இவ்வாறான பிணைப்பு அவ்விருவரிடம் இருந்தது வ்யாசா. இது எது போன்றது தெரியுமா? ராமானுஜர் தம் மனத்தில் கொண்டிருந்த சந்தேகங்களை அவரிடம் ராமானுஜர் வெளிப்படுத்தாத நிலையிலும் தேவப் பெருமாள் அவருக்குத் தெளிவு படுத்தியது போலேதான் இதுவும். இவ்வாறன உறவுகள் மனம் ஆத்மா மூலமாக ஏற்படுவதேயன்றி தேஹத்தினால் அல்ல. இப்படிப்பட்ட சம்பந்தத்தைத்தான் ஆளவந்தாரும் ராமானுஜரும் கொண்டிருந்தனர்.

இதுவரை நாம் ராமானுஜரைப் பற்றியும் அவருடைய ஆசார்யர்களைப் பற்றியும் தெரிந்து கொண்டோம். நாளை நான் அவர் எவ்வாறு அவர் ஒரு சிறந்த ஆசார்யராக விளங்கினார் என்றும் அவருடைய பாதையில் அவரை வந்தடைந்த பல சிஷ்யர்களைப் பற்றியும் உங்களுக்குச் சொல்கிறேன்.

அடியேன் கீதா ராமானுஜ தாசி

ஆதாரம்:  http://pillai.koyil.org/index.php/2016/08/beginners-guide-ramanujar-1/

வலைத்தளம் – http://pillai.koyil.org/

ப்ரமேயம் (குறிக்கோள்) – http://koyil.org
ப்ரமாணம் (க்ரந்தங்கள்) – http://granthams.koyil.org
ப்ரமாதா (ஆசார்யர்கள்) – http://acharyas.koyil.org
ஸ்ரீவைஷ்ணவக் கல்வி வலைத்தளம் – http://pillai.koyil.org/

ஸ்ரீ வைஷ்ணவம் – பால பாடம் – ஆளவந்தாரின் சிஷ்யர்கள் – 2

ஸ்ரீ: ஸ்ரீமதே சடகோபாய நம: ஸ்ரீமதே ராமானுஜாய நம: ஸ்ரீமத் வரவரமுநயே நம:

ஸ்ரீவைஷ்ணவம் – பால பாடம்

<< ஆளவந்தாரின் சிஷ்யர்கள் – 1

திருக்கோஷ்டியூர் நம்பி, திருக்கச்சி நம்பி மற்றும் மாறனேர் நம்பி

tirukkachinambi

பராசரனும் வ்யாசனும் ஆண்டாள் பாட்டியின் வீட்டிற்கு வருகிறார்கள். அவர்களின் நண்பர்களான வேதவல்லி, அத்துழாய் மற்றும் ஸ்ரீவத்ஸாங்கனும் அவர்களுடன் வருகிறார்கள்.

பாட்டி (புன்முறுவலுடன்) : உள்ளே வாருங்கள் குழந்தைகளே. வ்யாசா, நான் நேற்றுச் சொன்னது போலவே, நீ உன்னுடைய எல்லா நண்பர்களையும்  அழைத்து வந்து விட்டாயே!

வ்யாஸ : ஆமாம் பாட்டி, நானும் பராசரனும் ஸ்ரீவத்ஸாங்கனுக்கு, ராமானுஜரைப் பற்றியும் அவருடைய ஆசார்யர்களைப் பற்றிய கதைகளைச் சொன்னோம். அவனும் மேலும் கதைகளை உங்களிடம் கேட்க விரும்பி எங்களுடன் இன்று வந்து விட்டான்.

பாட்டி : நல்லது. வா, உட்கார். இன்று நான், நம் சம்பிரதாயத்தில் மிகச் சிறந்த இரண்டு ஆசார்யர்களான திருக்கச்சி நம்பியைப் பற்றியும் திருக்கோஷ்டியூர் நம்பியைப் பற்றியும் சொல்கிறேன்.

ஸ்ரீவத்ஸாங்கன் : பாட்டி, திருக்கச்சி நம்பி சென்னையிலிருந்து ஸ்ரீபெரும்புதூருக்கு செல்லும் வழியிலுள்ள பூவிருந்தவல்லி என்னும் இடத்தில் அவதரித்தவர். அந்தக் கோயிலுக்கு நாங்கள் போன வருடம் கோடை விடுமுறையில் சென்றிருந்தோம்.

பாட்டி: மிகச்சரி. அவர் தேவப்பெருமாளுக்கு திருவாலவட்ட கைங்கர்யம் செய்து வந்தவர். பெருமாளுடன் உரையாடும் பேறு பெற்றவர். அவர் தேவப்பெருமாளுடைய அன்பிற்கும்  நெருக்கத்திற்கும் பாத்திரமானவர். ராமானுஜர் காஞ்சிபுரத்திற்கு வந்த பொழுது திருக்கச்சி நம்பி தான் அவருக்கு முதல் ஆசார்யராக இருந்து தம் சிஷ்யராக ஏற்று, ராமானுஜரை எம்பெருமானுக்குத் தொண் டு செய்வதில் முதலில் ஈடுபடுத்தி அருளியவர்.

வ்யாஸ: ராமானுஜர் என்ன கைங்கர்யம் செய்தார் பாட்டி?

பாட்டி : தமக்கு நல்வழி காட்டும்படி ராமானுஜர் கோர, திருக்கச்சி நம்பி ராமானுஜரை அருகிலிருந்த சாலைக்கிணறு  என்னும் கிணற்றிலிருந்து பெருமாளுடைய திருமஞ்சனத்திற்கான நீரைக் கொண்டு வரும் கைங்கர்யத்தில் ஈடுபடுமாறு கூறினார். இதைத்தான் முதல் கைங்கர்யமாக ராமானுஜருக்கு திருக்கச்சி நம்பிகள் காட்டிக்கொடுத்தார். அவருக்கு சாஸ்திரங்களில் இருந்த ஞானத்திற்கும் எம்பெருமானிடத்திலிருந்த அன்பிற்கும்  நிகரே இல்லை. ராமானுஜரும் திருக்கச்சி நம்பிகளிடத்தில் மிகுந்த அன்பும் பணிவும் கொண்டவராக தம்மை அவரின் சிஷ்யராக ஏற்று தமக்கு பஞ்சசம்ஸ்காரம் செய்விக்கும்படி வேண்டினார்.

பராசர : ஆனால் பாட்டி, பெரிய நம்பி ராமானுஜருக்கு மதுராந்தகத்தில் பஞ்ச ஸம்ஸ்காரம் செய்து வைத்தார் என்று எங்களுக்கு நீங்கள் சொன்னீர்களே ?

பாட்டி : ஆமாம் பராசரா . நீ அதை நன்கு நினைவில் வைத்திருப்பது நல்லது. சாஸ்திரங்களை நன்கு அறிந்த அறிஞரான திருக்கச்சி நம்பி, சாஸ்திரங்களில் கூறியிருந்த சில நியதிகளின்படி  ராமானுஜருக்குத் தம்மால் பஞ்ச ஸம்ஸ்காரம் செய்விக்க இயலாது என்று அறிந்திருந்தார். அதை அவர் ராமானுஜருக்கு விளக்க, சாஸ்திரங்களின் கூறியிருந்தபடியால் ராமானுஜரும் அதனை ஏற்றுக்கொண்டார். இதைக் கொண்டே ராமானுஜர் நம் சம்பிரதாயத்தின் தர்மத்தின் மீதும் புனிதத்தன்மையின் மீதும் கொண்டிருந்த அசையாத நம்பிக்கையையும் ஊக்கத்தையும் அறிந்து கொள்ளலாம். நம்முடைய ஆசார்யர்கள் போலவே அவரும் நம் சாஸ்திரங்களில் சொல்லியிருந்தால் அதில் சந்தேகம் ஏதும் கொள்ளாமல் எக்கேள்வியும் இன்றி பகவானுடைய வாக்கும் ஆணையும் அதுவே என்று நம்பினார். ராமானுஜருக்கு நம் சம்பிரதாயத்தில் எழுந்த சந்தேகங்களுக்கும்  கேள்விகளுக்கும் திருக்கச்சி நம்பி தீர்த்து வைத்து நல்வழி காட்டினார். திருக்கச்சி நம்பி ராமானுஜரின் சந்தேகத்தை நிவர்த்திக்கும் பொருட்டு தேவப்பெருமாளுடன் உரையாடியது குறித்து வெகு சுவையான ஒரு கதை உண்டு .

வேதவல்லி : அந்த சந்தேகங்கள் என்ன ? தேவப் பெருமாள் என்னதான் பாட்டி கூறினார்?

பாட்டி : ஒரு முறை ராமானுஜரின் உள்ளத்தில் சில குழப்பங்கள் எழுந்தன. அவர் திருக்கச்சி நம்பி தேவப்பெருமாளுடன் உரையாடக் கூடியவர்  என்பதால் நம்பியை நாடினார். நம்பியும் எம்பெருமானிடம் சென்று கைங்கர்யங்கள் செய்து ராமானுஜரின் கோரிக்கைகளை எழுப்ப,  தக்க தருணம் பார்த்திருந்தார். தேவப்பெருமாளும் நம்பியின் தயக்கத்திற்கான காரணம் என்னவென்று  கேட்டார். நம்பி ராமானுஜருக்கு இருந்த தெளிவுபடுத்தவேண்டிய  சில சந்தேகங்கள் இருப்பதாக கூற, தேவப்பெருமாள் அந்தர்யாமியாகையால் , பரிவோடு கூறினார் – ”ராமானுஜரிடம் கூறவும் 1) அனைத்திலும் உயர்ந்த பரமாத்மா நானே, ஐயமில்லை 2) அனைத்து உயிரினங்களிலும் உயிரற்றவையிலும் அந்தர்யாமியாக இருப்பவன் நானே அவை எனக்கு நிகரன்று. அவை என்னிலிருந்து மாறுபட்டவை மட்டுமின்றி எனக்கு அடிமைப்பட்டவை  3) என்னை மாத்திரமே சரணாக பற்றுவதால் மட்டுமே என்னைப் புரிந்து கொள்ளவும் என்னை வந்தடையவும் இயலும்.    4) என்னை சரணடைந்த என் பக்தர்களை நான் தவறாது நினைவில் கொண்டு அவர்களுடைய அந்திமக் காலத்தில் ரக்ஷிப்பேன். 5) என்னுடைய  பக்தர்கள் இவ்வுலகை விட்ட பின், அவர்களுக்கு என்னுடைய உறைவிடமான ஸ்ரீவைகுண்டத்தில்  நித்ய கைங்கர்யங்களைச் செய்யும் வண்ணம் அருள்வேன்; இறுதியாக 6)  பெரிய நம்பியை ஆசார்யனாகக் கொள்ளவும்”. ராமானுஜருக்கு எழுந்த ஐயங்கள் என்னவென்று தேவப்பெருமாளும் கேட்கவில்லை, நம்பியுமே அந்த ஐயங்கள் என்னவென்பதை அறிந்தவரல்ல. நம்பி ராமானுஜருக்கு இந்த விடைகளைச் சொல்ல, ராமானுஜர் அடைந்த ஆனந்தத்திற்கு அளவேயில்லை. தேவப்பெருமாளின் கருணைக்கு எல்லையேது. ராமானுஜருக்கு எப்பொழுது சந்தேகங்களோ  சஞ்சலங்களோ எழுந்தாலும் தேவப்பெருமாள் அவருக்கு எப்பொழுதும் தெளிவு கொடுத்தவர். தாம் ஸமாச்ரயணம் பெற்றுக்கொள்ள பெரிய நம்பியை அணுக வேண்டும் என்ற தெளிவு ராமானுஜருக்கு இப்பொழுது ஏற்பட்டு விட்டதனால், அவர் திருக்கச்சி நம்பியிடமிருந்து ஆசி பெற்றுக்கொண்டு பெரிய நம்பியைக் காண ஸ்ரீரங்கத்திற்க்கு புறப்பட்டார்; அதற்குப் பின்னால் நடந்ததை நாம் அறிவோம் இல்லையா குழந்தைகளே?

வ்யாச : ஆமாம் பாட்டி, எங்களுக்கு நினைவிருக்கிறது.

பாட்டி : நம் சம்பிரதாயத்தில் பிற ஸ்ரீவைஷ்ணவர்கள் முன்பு ஒரு ஸ்ரீவைஷ்ணவனுக்கு இருக்க வேண்டிய மிக இன்றியமையாத குணம் எளிமை, இதனை நைச்ய பாவம் என்றும் அடிக்கடி வழங்குவர். பெரிய நம்பி வாய்ச்சொல் அளவில் இல்லாமல் தமது உள்ளப்பூர்வமான எளிமைக் குணத்தினால், எளிமைக்கு நடமாடும் உதாரணமாக விளங்கியவர். பெரிய நம்பி மிக எளிமையாக விளங்கி பிற ஸ்ரீவைஷ்ணவர்களுடன் மிகுந்த மரியாதையுடன் நடத்தியவர். ஒரு சுவையான சம்பவத்தினால் இதனை விளங்கிக் கொள்ளலாம். பெரிய நம்பியைப் போலவே ஆளவந்தாருக்கு மற்றொரு சீடராக மாறனேர் நம்பி என்னும் ஒரு உயர்ந்த ஆசார்யர் அக்காலத்தில் இருந்தார். மாறனேர் நம்பிக்கு தமது அந்திமக் கைங்கர்யங்களை ஒரு ஸ்ரீவைஷ்ணவர் செய்ய வேண்டும் என்பது விருப்பமாக இருந்தது; அவர் பெரிய நம்பி அதனை நிறைவேற்ற வேண்டும்  என்று கோரினார். இதற்குப் பெரிய நம்பி உகப்போடு ஒப்புக் கொண்டார்; அதனால் ஒரு கீழ்க்குலத்தில் பிறந்தவருக்கு அந்திமக் கைங்கர்யங்களை செய்து சாஸ்திரத்திற்குப்  புறம்பாக நடந்ததனால் அவ்வூரிலிருந்த பிற மக்களின் கோபத்திற்கு உள்ளானார். இதற்குப் பெரிய நம்பி சொன்ன விளக்கம் என்னவென்றால் பாகவத கைங்கர்யத்தை மிகுந்த சுத்தியுடனும் பணிவுடனும் செய்ய வேண்டும் என்று நம்மாழ்வாரின் உபதேசத்தின் படியே தாம் இதனைச் செய்தார் என்பதே. பாகவதர்களை, அவருடைய  குலத்தையோ பிறப்பையோ பாராமல், அவரிடம் மிகுந்த பணிவுடன் நாம் நடக்க வேண்டும். இவ்வாறான நைச்ய பாவத்தைக் கொள்கையளவில் அல்லாமல், தம் வாழ்க்கையில் அதன் படியே இருந்தவர் பெரிய நம்பி. எல்லா ஸ்ரீவைஷ்ணவர்களும் எம்பெருமானுக்கு பிரியமானவர்களாகையால் அவர்களை மிகுந்த பணிவோடு கொண்டாட வேண்டும் என்று அவர் நம்பினார். மேலும், பெரிய நம்பி, ஒரு உண்மையான பக்தனின் அந்திமக் காலத்தில் உள்ள இடமும் நிலையும் எவ்வாறாக இருந்தாலும், எம்பெருமான் அந்த பக்தருக்கு ஸ்ரீவைகுண்டத்தில் அந்தமில் பேரின்பமான கைங்கர்யத்தை அருளுவார் என்று திருக்கச்சி நம்பிக்கு தேவப்பெருமாள் அருளினார் அல்லவா அதனையும் ஆழ்ந்த்து நம்பினார்; இவர் இருந்த காலத்தில் தம் ஆசார்யரான ஆளவந்தாரின்  உபதேசப் படியும் நம்மாழ்வாரின் உபதேசங்களின் படியும் இருந்தவர். இன்றைக்கு இது போதுமா அல்லது மேலே திருக்கோஷ்டியூர் நம்பி பற்றிச் சொல்லட்டுமா?

azhwar-acharyas-ramanuja

வேதவல்லி : அவரைப் பற்றியும் கதைகள் உங்களிடம் உண்டா?

பாட்டி : ஆமாம், நிறைய உண்டு!

அத்துழாய் : அப்படியானால் திருக்கோஷ்டியூர் நம்பியைப் பற்றியும் சொல்லுங்கள் பாட்டி.

பாட்டி : திருக்கோஷ்டியூர் நம்பியும் ஆளவந்தாருடைய பிரதம சிஷ்யர்களில் ஒருவர்; அவருக்கு திருமந்த்ரம் மற்றும் சரம ச்லோகத்தின் பொருளை உபதேசிக்கும் பொறுப்பு அளிக்கப்பட்டிருந்தது. அவை என்னவென்று அறிவீர்களா?

வ்யாச : ஓம் நமோ நாராயணாய என்பது தான் திருமந்த்ரம்.

ஸ்ரீவத்ஸாங்கன் : ஸர்வ தர்மான் பரித்யஜ்ய மாம் ஏகம் சரணம் வ்ரஜ ; அஹம் த்வா ஸர்வ பாபேப்யோ மோக்ஷயிஷ்யாமி மாஸுச: என்பதுதான் சரம ஸ்லோகம் .

பாட்டி : மிக நல்லது. இந்த மூன்று வாசகங்களுக்கும் மிக ஆழ்ந்த கருத்துக்கள் பொதிந்துள்ளன; அவற்றை ஆசார்யரிடம் இருந்து உபதேசமாக பெற்றறிய வெண்டும்.

வேதவல்லி : ஆனால் பாட்டி, நம்மில் பெரும்பாலானவர்களுக்கும் இவ்வாசகங்களின் பொருள் தெரிந்துள்ளதே.

பாட்டி: ஆம், நம்மில் பலரும் இவற்றின் பொதுவான கருத்தினை அறிந்து கொண்டிருக்கிறோம் ஆனாலும், இவை ஒவ்வொன்றிலும் பொதிந்துள்ள நம் சம்பிரதாயத்தின் ஆழ்ந்த கருத்துக்கள் நம் புரிதலுக்கு அப்பாற்பட்டவை; அவற்றை ஒரு ஆசார்யனின் அருளின்றியோ வழிகாட்டுதலின்றியோ முழுவதுமாக அறிந்து கொள்ள இயலாது. ஆகையினால்தான் திருக்கோஷ்டியூர் நம்பிக்கு ராமானுஜருக்கு இக்கருத்துக்களை உபதேசிக்கும் முக்கியமான பொறுப்பு அளிக்கப்பட்டிருந்தது.

அத்துழாய் : பாட்டி, ராமானுஜர் திருக்கோஷ்டியுர் நம்பியிடம் உபதேசம் பெற 18 முறைகள் சென்றார் என்று நான் கேள்விப்பட்டிருக்கிறேனே. அது உண்மையா? அவர் ஏன் அத்தனை சிரமத்திற்கு உள்ளானார்?

பாட்டி : ஆமாம், அது உண்மைதான். ஒருபுறம் இதனை ராமானுஜரின் நம் சம்பிரதாயத்தில் இருந்த ஊக்கத்தையும் ச்ரத்தையையும் அறிய திருக்கோஷ்டியூர் நம்பி செய்த சோதனை என்று கொள்ளலாம்; மறுபுறம் இது ராமானுஜரின் விடாமுயற்சிக்கும் பொறுமைக்கும் சான்றாகவும் கொள்ளலாம். நாம் சிரமங்களுக்கு உள்ளாகும்பொழுது, அதனை நாம் பொறுமையோடு எதிர்கொண்டு விடாமுயற்சியோடு அந்த தடைகளைத்தாண்ட வேண்டும். ராமானுஜர் எத்தனை முறை திருக்கோஷ்டியுர் நம்பியினிடம் சென்றார் என்று பாருங்கள், 18 முறைகள்! அவர் உறுதியுடன் இருந்து, இறுதியில், 18ஆவது முறைதான் அவர் சரம ச்லோகத்தின் செறிந்த கருத்துக்களை திருக்கோஷ்டியூர் நம்பியிடத்தில் உபதேசமாக பெற்றார்.

வ்யாச : பாட்டி, திருக்கோஷ்டியூர் நம்பி கண்டிப்பான ஆசார்யராக இருந்தார் போலிருக்கிறதே. அவர் ராமானுஜரிடத்தில் சற்று கருணையோடு இருந்திருக்கலாம்.

பாட்டி : மேம்போக்காக இச்சம்பவத்தைப் பார்த்தால் நம் எல்லாருக்கும் இதே தவறான புரிதலே ஏற்படும்.  ஆனால் அது உண்மையல்ல. அவர் பார்ப்பதற்கு ராமானுஜரிடத்தில் மிகவும் கடுமையாக இருந்தார்போல் இருந்தாலும், அவரிடத்தில் மிகவும் உள்ளன்பும் கனிவும் கொண்டு அவருடைய நன்மையை நோக்கமாகக் கொண்டிருந்தார். மிகவும் முதிய ஒரு தந்தை தம் மகனிடத்தில் கண்டிப்புடன் இருப்பது போல் தோன்றினாலும் மகனுடைய நன்மைக்காக எத்தகைய தியாகத்தையும் செய்யும்  தந்தையைப் போன்றவர் அவர். நான் நேற்று திருமாலையாண்டனைப் பற்றி கூறுகையில், உங்களிடம் ஆண்டானுக்கும் ராமானுஜருக்கும் சில கருத்து வேறுபாடுகள் இருந்தன என்று சொன்னேனே நினைவிருக்கிறதா? ராமானுஜரின் பொருட்டு அவ்விருவரின் கருத்து வேறுபாடுகளையும்  சுமூகமாக களைந்தவர் திருக்கோஷ்டியூர் நம்பியாவார். உண்மையில், ராமானுஜர் பிற ஸ்ரீவைஷ்ணவர்கள் மீது கொண்டிருந்த தன்னலமற்ற அன்பினால் ஈர்க்கப்பட்டு அவருக்கு எம்பெருமானார் (எம்பெருமானைக் காட்டிலுமே உயர்ந்தவர்) என்று ராமானுஜரை  அன்புடன் அழைத்தவர் திருக்கோஷ்டியூர் நம்பியே. இவ்வாறாகத்தான்  ராமானுஜருக்கு “எம்பெருமானார்” என்ற அழகிய திருநாமம் ஏற்பட்டது. ஸ்ரீரங்கத்தில் சில விஷமிகள் ராமானுஜருடைய உணவில் விஷம் கலந்தபொழுது, தக்க சமயத்தில் அங்கே வந்து ராமானுஜரின் பாதுகாப்பைக் கருத்தில் கொண்டு அவருக்கு உணவு தயாரிக்கும் பொறுப்பைக் கிடாம்பியாச்சானிடம் ஏற்படுத்தியவரும் திருக்கோஷ்டியூர் நம்பிதாம்.  அன்பு நிறைந்த ஒரு தந்தை தன் மகனுடைய  நன்மையை எவ்வாறு   கருத்தாகக் கொள்வாரோ அதே போல் திருக்கோஷ்டியூர் நம்பியும் ராமானுஜருடைய நன்மையை நோக்காகக் கொண்டிருந்தார். அவருடைய மேன்மையைப் பற்றியும், அளவற்ற ஞானத்தைப் பற்றியும் அவருடைய ஆசார்யரான ஆளவந்தாரிடம் அவர் கொண்டிருந்த பக்தியைப் பற்றியும் பலப் பல கதைகள் உண்டு. அக்கதைகளை உங்களுக்கு சொல்ல எனக்கு மிகவும் விருப்பமே. அவற்றைக் கேட்டுக்கொண்டேயிருக்க உங்களுக்கு ஆவல் இருந்தாலும், நேரம்  கடந்தால் உங்கள் பெற்றோர் கவலை கொள்வார்கள் என்பது நினைவிருக்கிறதா? இப்பொழுது இப்பழங்களை பெற்றுக்கொண்டு உங்கள் வீடுகளுக்குத் திரும்புங்கள். அடுத்த முறை நான் இது போல நம் ஆசார்யர்களைப் பற்றி மேலும் பல கதைகளைச் சொல்கிறேன்.

குழந்தைகள், பழங்களைப் பகிர்ந்து கொண்டு திருக்கச்சி நம்பியைப் பற்றியும், மாறனேர் நம்பியைப் பற்றியும் திருக்கோஷ்டியூர் நம்பியைப் பற்றியும் எண்ணியவாறு தங்கள் வீட்டிற்குக் கிளம்பிச் சென்றார்கள்.

அடியேன் கீதா ராமானுஜ தாசி

ஆதாரம்: http://pillai.koyil.org/index.php/2016/08/beginners-guide-alavandhars-sishyas-2/

வலைத்தளம் – http://pillai.koyil.org/

ப்ரமேயம் (குறிக்கோள்) – http://koyil.org
ப்ரமாணம் (க்ரந்தங்கள்) – http://granthams.koyil.org
ப்ரமாதா (ஆசார்யர்கள்) – http://acharyas.koyil.org
ஸ்ரீவைஷ்ணவக் கல்வி வலைத்தளம் – http://pillai.koyil.org/