బాల పాఠము – పరాశర భట్టర్

శ్రీః  శ్రీమతే శఠకోపాయ నమః  శ్రీమతే రామానుజాయ నమః  శ్రీమత్ వరవరమునయే నమః

శ్రీ వైష్ణవం – బాల పాఠము

<< ఎంబార్

పరాశర, వ్యాస, వేదవల్లి మరియు అత్తుళాయ్ తో కలిసి ఆండాళ్ నాన్నమ్మ ఇంటికి వస్తారు.

నాన్నమ్మ: పిల్లలు స్వాగతం. ఈ రోజు మనం తరువాత ఆచార్యులు, పరాశర భట్టార్ గురించి చెప్పుకుందాము. ఎంబార్ శిష్యులైన వీరు ఎమ్బెరుమానార్ పట్ల గొప్ప భక్తి కలిగి ఉండేవారు. పిల్లలు, నేను ముందు చెప్పినట్టుగా పరాశర మరియు వ్యాస ఋషులకు కృతజ్ఞతా భావాన్ని వ్యక్తపరచటానికి  ఎమ్బె,రుమానార్, కూరత్తాళ్వార్ కు జన్మించిన ఇద్దరు కుమారులకు పరాశర భట్టార్ మరియు వేద వ్యాస భట్టార్ అని పేర్లు పెట్టారు. ఇది ఆళవందార్ కు చేసిన మూడు వాగ్దానాల్లో ఒకటి. పరాశర భట్టార్ మరియు వేద వ్యాస భట్టార్ కూరత్తాళ్వార్ మరియు అతని భార్య ఆండాళ్ లకు శ్రీరంగం పెరియ పెరుమాళ్ అనుగ్రహ ప్రసాదంగా పుట్టారు.

azhwan_bhattars

కూరత్తాళ్వారు వారి కుమారులు పరాశర భట్టార్ మరియు వేద వ్యాస భట్టార్

పరాశర: నాన్నమ్మా, వ్యాసకూ నాకూ ఈ ఆచార్యుల పేర్లే పెట్టారా?

నాన్నమ్మ: అవును పరాశర. పిల్లలకు సాధారణంగా పెరుమాళ్ లేదా ఆచార్యుల పేర్లు పెడతారు.  పిల్లలను పిలిచే కారణంగానైనా మనం పెరుమాళ్ ఇంకా ఆచార్యుల యొక్క దివ్య పేర్లను ధ్యానించే అవకాశం లభిస్తుంది. పెరుమాళ్ లేదా ఆచార్యుల పేర్లు పెట్టడానికి కారణం ఖచ్చితంగా ఇదే, వారి పవిత్రమైన పేర్లను పిలుస్తూ ఆచార్యుల మరియు పెరుమాళ్ల కళ్యాణ గుణాలను ధ్యానించే అవకాశం పొందుతాం. లేకపోతే, ఈ బిజీ ప్రపంచంలో, ప్రత్యేకంగా ఆచార్యులు ఇంకా పెరుమాళ్ యొక్క దివ్య నామాలను ధ్యానించేందుకు సమయం కేటాయించడం కష్టం. ఈ రోజుల్లో పరిస్థితులు మారాయి. ప్రజలు అర్ధం లేని నామమాత్రపు పేర్ల వెనుకబడి, పెరుమాళ్, తాయార్ మరియు ఆచార్యులను గుర్తుంచుకోవటంలేదు.

శ్రీరంగానికి వచ్చిన తరువాత,ఆళ్వాన్  రోజువారీ ఆహారం కోసం ఉంజవృత్తి (ధర్మం) కి వెళ్ళేవారు. భారీ వర్షాల కారణంగా ఒక రోజు ఉంజవృత్తికి వెళ్ళలేకపోయారు. ఆళ్వాన్  మరియు వారి భార్య ఆండాళ్ ఖాళీ కడుపుతో నిద్రపోయారు. రాత్రి సమయంలో, ఆండాళుకి ఆలయంనుండి నైవేద్య ఘంటానాదం వినిపిస్తుంది. ఆండాళ్ ఎమ్బెరుమానుతో అంటారు, “ఇక్కడ, మీ భక్తులు ప్రసాదం లేకుండా ఉంటే, అక్కడ మీరు మంచి భోగాన్ని ఆనందిస్తున్నారా?” అని. పరిస్తితిని గ్రహించి, పెరియ పెరుమాళ్ తన ప్రసాదమును తన అన్ని సామగ్రులు, అడంబరాలతో (ఆలయ మర్యాదలతో) సహా ఉత్తమ నంబి ద్వారా ఆళ్వాన్ మరియు ఆండాళ్ లకు పంపుతారు. ప్రసాదం వస్తుండగా చూసి  ఆళ్వాన్ విస్మయం చెందుతారు. వెంటనే, వారు ఆండాళ్ ని “నువ్వేమైన ఎమ్బెరుమానుకి ఫిర్యాదు చేసావా?” అని అడుగుతారు. ఆండాళ్ అవునని అంగీకరిస్తుంది.అందుకు ఆళ్వాన్ కరవరపడి, కేవలం రెండు గుప్పిల్ల ప్రసాదాన్ని మాత్రమే స్వీకరిస్తారు, అందులో కొంచెం వారు తిని మిగిలిన శేషాన్ని ఆండాళ్ కు ఇస్తారు. ఆ రెండు గుప్పిల్ల ప్రసాదమే వారికి అందమైన ఇద్దరు శిశువులను ప్రసాదిస్తుంది.

వ్యాస: నాన్నమ్మా, ఎంబార్ ఎలా భట్టారుకి ఆచార్యులైనారు?

నాన్నమ్మ: పిల్లలు ఇద్దరూ జన్మించిన తరువాత, ఎంబార్ ఆ ఇద్దరు పిల్లలను చూసి వెంటనే వారిద్దరూ మన సాంప్రదాయము కోసమే జన్మించారని తెలుసుకుంటారు. వారి ముఖంలో తేజస్సు చూసి వెంటనే వారికి దుష్టశక్తులనుండి రక్షణగా ద్వయ మహామంత్రాన్ని పఠిస్తారు. ఎమ్బెరుమానార్ ఆ ఇద్దరు పిల్లలను చూసి వారు ద్వయ మహామంత్రం ద్వారా సాంప్రదాయములోకి ప్రవేశం చేయబడ్డారని గమనిస్తారు. ఎంబార్ను విచారించగా వారు ద్వయ మహామంత్రాన్ని పఠించినట్టు వివరిస్తారు. ఎంబార్ ద్వారా ఆ పిల్లలు ద్వయ మహామంత్రం పొందినందువల్ల వారే ఆ పిల్లలకు ఆచార్యులైనారు. ఆ ఇద్దరు పిల్లలు ఎంబార్ మరియు వారి తండ్రి ఆళ్వాన్ దగ్గర నుండి విద్య నేర్చుకుంటూ పెరిగి పెద్దవాళ్ళవుతారు. పెరియ పెరుమాళ్ ఆశీర్వాదం అనుగ్రహంతో జన్మించినందువల్ల, ఇద్దరు పిల్లలకు పెరియ పెరుమాళ్ మరియు పెరియ పిరాట్టి  (శ్రీరంగ నాచియార్) అంటే అమితమైన భక్తి ఉండేది. ఎమ్బెరుమానార్ కూడా పరాశర భట్టార్ను పెరియ పెరుమాళ్కు దత్తతు ఇవ్వమని ఆళ్వాన్ కు చెబుతారు,  ఆళ్వాన్ అలాగే చేస్తారు. వాస్తవానికి శ్రీరంగ నాచియారే స్వయంగా తన సన్నిధిలో భట్టార్ను పెంచారని చెప్తారు. పెరియ పెరుమాళ్, పిరాట్టి మరియు భట్టార్ ల మధ్య బంధం అటువంటిది. ఒకసారి, భట్టార్ పెరుమాళ్ సన్నిధిలో కొన్ని పాసురాలు పాడి బయటకు వస్తారు. రామానుజులు భట్టార్ న్ని చూసి అనంతాళ్వార్ ఇంకా ఇతర శిష్యులను పిలిచి భట్టార్ న్ని తనతో సమానంగా వ్యవహరించమని నిర్దేశిస్తారు, రామానుజులు భట్టార్లో తనను తాను చూసుకునేవారు.  భట్టార్ ను తరువాతి ధర్శప్రవర్తకులుగా (సాంప్రదాయ నాయకుడుగా) వారు భావించేవారు. భట్టార్ చిన్నతనం నుండి చాలా బుద్దిశాలి. వారి  తెలివితేటలు నిరూపించటానికి  అనేక కథలు ఉన్నాయి.

అత్తుళాయ్: వారి తెలివితేటల గురించి మాకు చెప్పండి.

నాన్నమ్మ: ఒకసారి, భట్టార్ వీధిలో ఆడుకుంటున్నప్పుడు, సర్వఘ్య భట్టన్ అనే పేరు గల ఒక విద్వాంసుడు పల్లకిలో వస్తుంటారు. రామానుజుల వంటి గొప్ప విద్వాంసులు ఉంటున్న శ్రీరంగంలో, వీరిని పల్లకిలో తీసుకురావడం చూసి భట్టార్ ఆశ్చర్యపోతారు.భట్టార్ నేరుగా ఆయన వద్దకు వెళ్ళి తనతో చర్చకు రమ్మని వారితో సవాలు చేస్తారు. సర్వఘ్య భట్టన్, భట్టార్ను చిన్నపిల్లవాడిగా పరిగణించి, భట్టార్ ఏ ప్రశ్న అడగినా తాను జవాబు ఇస్తానని అంటారు. భట్టార్ కొంచెం ఇసుక తీసుకొని, తన చేతిలో ఎంత ఇసుక ఉందని అడుగుతారు. సర్వఘ్య భట్టాన్ నోట్లో మాటలేక తనకు తెలియదంటారు. “అరచేతి నిండా” అని జవాబిచ్చుండవచ్చు అని భట్టార్ అంటారు. భట్టార్ యొక్క మేధాశక్తికి ఆశ్చర్యపోయి, సర్వఘ్య భట్టాన్ పల్లకిలో నుండి క్రిందకు దిగివచ్చి భట్టార్ ను ఎత్తుకొని వారి తల్లిదండ్రుల వద్దకు తీసుకువెళ్లి కీర్తిస్తారు.

వేదవల్లి: అది చాలా తెలివైన జవాబు.

నాన్నమ్మ: భట్టార్ చాలా చురుకైన పిల్లవాడు, పాఠాలు తొందరగా పట్టేసేవారు.వారి చిన్న వయస్సులో గురుకులంలోవున్న ఒకానొక సందర్భంలో, భట్టార్ వీధిలో ఆడుకుంటున్నప్పుడు ఆళ్వాన్ వచ్చి, తరగతికి హాజరు కాకుండా వీధిలో ఎందుకు ఆడుకుంటున్నావు అని అడుగుతారు. భట్టార్ “ప్రతిరోజూ వారు మళ్ళీ మళ్ళీ అదే పాఠాన్ని బోధిస్తున్నారు” అని అంటారు – సాధారణంగా ఒకే సందై 15 రోజులు చెప్తారు. అయితే, మొదటి రోజునే భట్టార్ పాఠం నేర్చేసుకునే వారు. ఆళ్వాన్ ఒక పాసురం పఠించమని అతనిని పరీక్షిస్తారు, భట్టార్ సునాయాసంగా పఠిస్తారు.

వ్యాస: తండ్రి లాగానే కొడుకు కూడా!

నాన్నమ్మ (చిరునవ్వు తో ): సరిగ్గా! భట్టార్ వారి తండ్రి ఆళ్వాన్ కూడా గొప్ప జ్ఞానం, జ్ఞాపకశక్తి కలిగి ఉండే వారు. ఆళ్వాన్ యొక్క కొన్ని ఇతర లక్షణాలలో వినయం మరియు గొప్పతనం వంటి గుణాలు భట్టార్కి వారసత్వంగా వచ్చాయి. ఒక సారి ఒక కుక్క శ్రీరంగం దేవాలయంలోకి ప్రవేశిస్తుంది. సాధారణంగా ఇలాంటి సందర్భాల్లో, దేవాలయ అర్చకులు గుడిని సంప్రోక్షించి శుభ్రం చేస్తారు. అర్చకులు ఒక లఘు (చిన్న) సంప్రోక్షణ చేయాలని నిర్ణయించుకుంటారు. ఇది విని, భట్టార్ పెరియ పెరుమాళ్ దగ్గరకి పరిగెత్తుకుంటూ వెళ్లి, ప్రతి రోజు నేను ఆలయంలోకి నడుచుకుంటూ వస్తాను, కానీ ఇంతవరకూ ఏ సంప్రోక్షణ చేయలేదు, ఇప్పుడు ఒక కుక్క దేవాలయంలోకి ప్రవేశించినప్పుడు ఎందుకు సంప్రోక్షణ చేస్తున్నారు? అని అడుగుతారు. అంతటి వినమ్ర స్వభావం ఉండేది వారికి. అంతటి గొప్ప విద్వాంసులు అయినప్పటికీ, తనను తాను వారు కుక్క కన్నా తక్కువగా పరిగణించేవారు. వారు దేవలోకంలో దేవునిగా జన్మించే కంటే శ్రీరంగంలో ఒక కుక్కగా జన్మించటానికి ఇష్టపడతాను అని చెప్పేవారు.

వేదవల్లి: నాన్నమ్మా, ఒకవేళ రంగ నాచియార్ భట్టార్ని బిడ్డలాగా పెంచితే వారు కూడా పెరుమాళ్ మరియు పిరట్టితో మాట్లాడేవారా, తిరుక్కచ్చి నంబి దేవపెరుమళ్ తో మాట్లాడినట్టుగా?

నాన్నమ్మ: అవును వేదవల్లి. భట్టార్ కూడా శ్రీరంగ పెరుమాళ్ మరియు పిరాట్టితో మాట్లాడేవారు. మీకు తెలుసా, సంవత్సరానికి ఒకసారి, వైకుంట ఏకాదశికి ముందు రోజు మరియు పగల్ పత్తు ఉత్సవం 10 వ రోజున, నంపెరుమాళ్ నాచియార్ తిరుక్కోలం అలంకరణ చేసుకునేవారు. ఆరోజు వారు రంగ నాచియార్ యొక్క అన్ని ఆభరణాలను ధరించి నాచియార్ లాగా అందంగా ఆసీనులౌతారు. అలాంటి రోజున నంపెరుమాళ్ భట్టార్ను పిలిచి తాను తాయార్ లా కనిపిస్తున్నానా లేదా అని అతన్ని అడుగుతారు. భట్టార్ ఎప్పుడూ తాయార్ పక్షపాతి, భక్తితో మరియు అభిమానంతో నంపెరుమాళ్ని చూసీ, అలంకారంలో కొరత లేదు కానీ ఎమ్బెరుమాన్ కళ్ళల్లో కరుణ కానరావట్లేదు అని అంటారు. వారి తల్లి అయిన నాచియార్ పట్ల వారికున్న ప్రేమ అలాంటిది.

భట్టారుకి వందలాది మంది అనుచరులు. వారి కాలక్షేపాలను క్రమం తప్పకుండా విని వారి బోధనలచే ప్రభావితమైన వారు చాలామంది ఉన్నప్పటికీ,  కొందరు భట్టార్ని ఇష్టపడేవారు కాదు. గొప్ప వ్యక్తులకు ఇది సాధారణమే. ఇది రామానుజులకు కూడా జరిగింది. ఒకసారి, భట్టార్ని ఇష్టపడని కొంతమంది, వారిని అసూయ ద్వేషాలతో నిందించడం ప్రారంభించారు. ఎవరైనా మీ పైన అరిస్తే నువ్వు ఏంచేస్తావు, వ్యాసా?

వ్యాస: అతనిపై తిరిగి అరుస్తాను. నేను ఎందుకు భరించాలి?

నాన్నమ్మ: అదే పెద్దలు కూడా చేసేది. కానీ మీకు తెలుసా భట్టార్ ఏమి చేసారో? తన ఆభరణాలు మరియు ఖరీదైన శాలువను తనపై కేకలు వేసిన వ్యక్తికి బహుమానంగా ఇస్తారు. “ప్రతి శ్రీ వైష్ణవుడు రెండు పనులు చేయాల్సిన అవసరం ఉంది – ఎమ్బెరుమాన్ని కీర్తించడం మరియు తన స్వంత లోపాల గురించి విచారించడం. నేను ఎమ్బెరుమాన్ని కీర్తించి పాడటంలో లోతుగా నిమఙ్ఞమైనా తన తప్పుల గురించి విచారించడం మరచిపోయాను. నా బాధ్యతను గుర్తుచేసి నాకు ఎంతో మేలు చేశావు, అందువల్ల నేను నీకు బహుమానం ఇస్తున్నాను”. వారి మనోభావం అలాంటిది.

పరాశర: నాన్నమ్మా, నంజీయర్ ని సాంప్రదాయంలోకి తీసుకురమ్మని రామానుజులు భట్టార్ని ఆదేశించారని మీరు చెప్పినట్టు నాకు గుర్తుంది. భట్టార్ అది ఎలా చేశారు?

పరాశర భట్టార్ (తిరువడిలో నంజీయర్) – శ్రీరంగం

నాన్నమ్మ: నీకు ఇంకా గుర్తుందని చాలా సంతోషంగా ఉంది పరాశర. అవును, రామానుజుల దివ్య సూచన ప్రకారం, భట్టార్ నంజీయర్ను మన సాంప్రదాయంలోకి తీసుకురావడానికి తిరునారాయణపురానికి వెళతారు. ఇంతకు ముందు ఈ స్థలం గురించి మనం విన్నాం? ఎప్పుడో ఎవరికైనా గుర్తుందా?

వేదవల్లి: నాకు గుర్తుంది. తిరునారాయణపురం గుడి రామానుజులచే సంస్కరించబడిన అనేక దేవాలయాలలో ఒకటి. రామానుజులు మెల్కోటేలో ఆలయ విధులను పునరుద్ధరించారు.

నాన్నమ్మ: చాలా మంచిది వేదవల్లి. ముస్లిం ఆక్రమణదారుల నుండి తిరునారాయణపురం  ఆలయంలోని ఉత్సవ మూర్తి సెల్వప్పిళ్ళైని తిరిగి తెచ్చి, ఆలయ పరిపాలనను రామానుజులు పునరుద్ధరిస్తారు. భట్టారు మాధవాచార్యుల (నంజీయర్ యొక్క అసలు పేరు) యొక్క తదీయారాధన కూటం (భాగవతుల భోజనాలయం) కు వెళ్ళి, తాను తినకుండా అక్కడే మాధవాచార్యుల వారికోసం ఎదురుచూస్తుంటారు. అది గమనించిన మాధవాచార్యులు భట్టారు వద్దకు వచ్చి, ఎందుకు తినలేదో వారికి ఏం కావాలో అడుగుతారు. వారితో చర్చించాలని భట్టార్ కోరుకుంటారు.

భట్టార్ గొప్పతనం గురించి విన్న మాధవాచార్యులు ఈ విషయాన్ని గ్రహించి (వారిని సవాలు చేసే ధైర్యం ఎవరికీ లేదు తెలుసుకొని) చర్చకు అంగీకరిస్తారు. భట్టార్ మొదట తిరునెడుందాండకం ఉపయోగించి మరియు తద్వారా శాస్త్రార్థాల గొప్పతనాన్ని, ఎమ్బెరుమాన్ ఆధిపత్యాన్ని నిరూపిస్తారు. మాధవాచార్యులు ఓటమిని అంగీకరించి, భట్టార్ చరనాలపైన పడి, వారిని ఆచార్యులుగా స్వీకరిస్తారు. భట్టార్ సాంప్రదాయ అర్థాలతో పాటు వారికి అరుళిచ్చెయల్ నేర్చుకోవడానికి ప్రత్యేక సూచనలు ఇస్తారు. భట్టార్ శ్రీరంగానికి చేరుకాగానే వారికి గొప్ప స్వాగతం లభిస్తుంది. భట్టార్ రాకకై ఆత్రంగా ఎదురుచూస్తున్నపెరియ పెరుమాళ్ ఆసక్తితో మొత్తం సంఘటనను భట్టార్ నోటివెంట వింటారు. భట్టార్ విజయంతో ఆనందపడి పెరియ పెరుమాళ్ మళ్ళీ తిరునెడుందాండకంను చదివి వినిపించమని భట్టార్ని కోరతారు.

భట్టార్ నంపెరుమాళ్ మరియు రంగ నాచియార్ తిరుమేని (దివ్య రూపం) పై చాలా ప్రేమ, అనురాగం కలిగి ఉండేవారు. ఒక సారి పెరియ పెరుమాళ్ ముందు కొన్ని పాసురాలు వాటి అర్ధాలను పఠిస్తుండగా పెరుమాళ్ సంతోషించి “ఇప్పుడే నీకు మోక్షాన్నిఇస్తున్నాను” అని అంటారు. భట్టార్ చాలా సంతోషించి నంపెరుమాళ్ తో, తనకు పరమపదంలో నంపెరుమాళ్ రూపంలో దర్శనం ఇవ్వకపోతే అక్కడ నుండి ఒక రంధ్రం చేసి దూకి శ్రీరంగానికి తిరిగి వచ్చేస్తానని అంటారు. ఒక సారి అనంతాళ్వార్ భట్టార్ని, పరమపదనాథునికి 2 చేతులు ఉంటాయా లేక 4  చేతులు ఉంటాయా అని ప్రశ్నిస్తారు. భట్టార్, ఒకవేళ వారికి 2 చేతులుంటే వారు పెరియ పెరుమాళ్ లాగా కనిపిస్తారు లేక ఒకవేళ వారికి 4 చేతులు ఉంటే నంపెరుమాళ్ లాగా కనిపిస్తారు అని సమాధానమిస్తారు. భట్టార్ నంపెరుమాళ్కి మించి ఇంకెవరినే చూసేవారు కాదు. వారు పెరుమాళ్ యొక్క ప్రతి దివ్య తిరుమేనిని నంపెరుమాళ్ సంబంధం తోనే చూసేవారు. నంపెరుమాళ్ వారికి మోక్షాన్ని ప్రసాదిస్తారు. వారి తల్లి అండాళ్ ఆశీర్వాదంతో ఈ ప్రపంచాన్ని విడిచిపెట్టి, ఆచార్యుల నిత్య కైంకర్యం చేయుటకు పరమపదానికి చేరుకుంటారు. వారు మన శ్రీ వైష్ణవ సాంప్రదాయం బాధ్యతను తదుపరి ఆచార్యులైన నంజీయర్ కి ఇస్తారు.

అత్తుళాయ్: నాన్నమ్మా, భట్టార్ జీవితం వినడానికి చాలా ఆసక్తికరంగా ఉంది. నమ్పెరుమాళ్ తో వారి బంధం భక్తి గురించి వింటే హృదయాన్ని కరిగించి వేస్తుంది. అటువంటి భర్త మరియు కుమారులు కలిగినందుకు ఆండాళ్ ధన్యురాలు.

నాన్నమ్మ:  అవును అత్తుళాయ్. నిజంగా ఆండాళ్ ధన్యురాలు. రేపు, నేను తదుపరి ఆచార్యులు నంజీయర్ గురించి చెబుతాను. ఇప్పుడు ఈ పండ్లు తీసుకొని ఇంటికి వెళ్లండి.

పిల్లలు భట్టార్ మరియు అతని దివ్య జీవితం గురించి ఆలోచిస్తూ వారి ఇళ్లకు వెళ్తారు.

మూలము : http://pillai.koyil.org/index.php/2016/08/beginners-guide-bhattar/

పొందుపరిచిన స్థానము http://pillai.koyil.org

ప్రమేయము (గమ్యము) – http://koyil.org
ప్రమాణము (ప్రమాణ గ్రంథములు) – http://granthams.koyil.org
ప్రమాత (ఆచార్యులు) – http://acharyas.koyil.org
శ్రీవైష్ణవ విద్య / పిల్లల కోసం– http://pillai.koyil.org

Leave a Reply

Your email address will not be published. Required fields are marked *