బాల పాఠము – ఎంబార్

శ్రీః  శ్రీమతే శఠకోపాయ నమః  శ్రీమతే రామానుజాయ నమః  శ్రీమత్ వరవరమునయే నమః

శ్రీ వైష్ణవం – బాల పాఠము

<< రామానుజులు – భాగము 2

 

పరాశర, వ్యాస వేదవల్లి మరియు అత్తుళాయ్ తో కలిసి ఆండాళ్ నాన్నమ్మ ఇంటికి వస్తారు.

నాన్నమ్మ: పిల్లలూ! స్వాగతం. మీ చేతులు కాళ్ళు కడుక్కోండి.  ప్రసాదం తీసుకువస్తాను. రేపు ఏరోజో మీకు తెలుసా? రేపు ఆళవందార్ తిరునక్షత్రం, ఆషాడ మాసం, ఉత్తరాషాడ నక్షత్రం. ఇక్కడ ఎవరు అళవందార్ ను గుర్తుచేసుకుంటున్నారు?

అత్తుళాయ్: నేను గుర్తుంచుకున్నాను! వారు రామానుజులను మన సాంప్రదాయంలోకి తీసుకురమ్మని దేవపెరుమాళ్ ని ప్రార్థిస్తారు.

వ్యాస : అవును. అంతేకాక, వారు పరమపదం చేరుకున్న తరువాత, వారి తిరుమేనిలో మూడు వేళ్లు ముడుచుకొని ఉంటాయి, ఆ మూడు వేళ్ళు వారి చివరి మూడు నెరవేరని కోరికలకు సూచన. వాటిని పూర్తి చేసేందుకు రామానుజులు వాగ్దానం చేస్తారు. రామానుజులు వాగ్దానం చేసిన వెంటనే, ఆ మూడు వేళ్ళు విప్పుకుంటాయి.

పరాశర: నాన్నమ్మా,  రామానుజుల ఆవందార్ల మధ్య ఆత్మసంబంధం అని, శారీరక ఇంద్రియాలకు అతీతమైనది అని మీరు చెప్పినట్టు మాకు గుర్తుంది.

నాన్నమ్మ: అవును ! వారి తిరునక్షత్రం రేపు. ఇదిగోండి ఈ ప్రసాదం తీసుకోండి. రేపు ఆలయానికి వెళ్లి సాంప్రదాయంలోకి రామానుజులను తెచ్చిన ఈ గొప్ప ఆచార్యులను మొక్కడం మర్చిపోకండి. ఇక మనం మన తదుపరి ఆచార్య ఎంబార్ గురించి తెలుసుకుందాం. ఎంబార్ కమల నయన భట్టార్ మరియు శ్రీదేవి అమ్మగారికి కుమారుడుగా మధురమంగళంలో జన్మించారు. అతని జన్మ పేరు గోవింద పెరుమాళ్. వారిని గోవింద భట్టార్, గోవింద దాస మరియు రామానుజ పాద ఛాయైయార్ అని కూడా పిలుస్తారు. అతను రామానుజుల బంధువు మరియు ఒకసారి రామానుజులు చంపబడకుండా వారిని రక్షిస్తారు.

వేదవల్లి: హత్య? నాన్నమ్మా, నేను ఒకసారి మాత్రమే రామానుజుల జీవితం ప్రమాదంలో ఉందని భావించాను, కూరత్తాళ్వారు పెరియ నంబి కలిసి వారి ప్రాణాలను రక్షిస్తారు. వారి జీవితం ఎన్నిసార్లు ప్రమాదంలో ఉన్నది నాన్నమ్మా?

నాన్నమ్మ: ఎన్నోసార్లు! సమయం వచ్చినప్పుడు నేను మీకు చెప్తాను. మొదటిసారి, వారి గురువు యాదవప్రకాశులు వారిని చంపాలని అనుకుంటారు. రామానుజులకు యాదవప్రకాశులకు మధ్య వేదాలలో సూచించిన అర్ధాల గూర్చి అభిప్రాయ భేదాలు ఎల్లప్పుడూ ఉండేవి. యాదవప్రకాశులు వేదాలలో వాక్యాలకు తారుమారు చేసి తప్పుడు అర్ధాలు చెప్పేవారు. అది విన్నప్పుడు రామానుజులకు బాధ కలిగించేది, విశిష్టాద్వైత సిద్ధాంతం ప్రకారం వారు యదార్థ అర్థాన్ని వివరించేవారు. యాదవప్రకాశులు ఒక అద్వైతి, రామానుజులు ఇచ్చిన వివరణలను అంగీకరించే వారు కాదు. రామానుజులు చెప్పిన వివరణలు అర్ధవంతమైనవి అని వారికి తెలిసినప్పటికిని వారికి పోటీగా భవించే వారు. రామానుజులు వారిని ఆచార్య స్థానం నుండి త్రోసిరాస్తారేమోనని భావించేవారు, కాని రామానుజులకు అలాంటి ఉద్దేశ్యాలు అణు మాత్రం కూడా ఉండేవి కాదు. అలా యాదవప్రకాశుల మనస్సులో రామానుజుల పట్ల అసూయా ద్వేషాలకు దారితీసాయి. యాదవప్రకాశులు వారి శిష్యులతో వారణాసి యాత్రా సమయాన రామానుజులను చంపడానికి పన్నాగం వేస్తారు. ఈ పన్నాగం గురించి తెలిసిన గోవింద పెరుమాళ్ రామానుజులకు తెలియచేస్తారు, ఆ శిష్య బృందంతో యాత్ర కొనసాగించ వద్దని హెచ్చరిస్తారు. వారిని దక్షిణం వైపున వున్న కాంచీపురానికి బయలుదేరితే వారి ప్రాణాలు సురక్షితంగా ఉంటాయని చెబుతారు. రామానుజులు అదే విధంగా బయలుదేరి వారి గురువు యొక్క హత్యా పన్నాగాన్నితప్పించుకుంటారు. ఇలా, గోవింద పెరుమాళ్ రామానుజుల ప్రాణాలను రక్షిస్తారు.

వ్యాస : నాన్నమ్మా, గోవింద పెరుమాళ్ కూడా యాదవప్రకాశుల శిష్యులేనా?

ఎంబార్ – మధురమంగళం

నాన్నమ్మ: అవును వ్యాస. రామానుజ మరియు గోవింద పెరుమాళ్లు ఇద్దరూ యాదవప్రకాశుల వద్ద విద్య నేర్చుకునేవారు. రామానుజులు తనను తాను రక్షించుకోవడానికి దక్షిణానికి వెళ్ళినప్పటికీ, గోవింద పెరుమాళ్ తనయాత్రను కొనసాగించి, శివభక్తుడై కాళహస్తి అనే స్థలంలో ఉంటూ ఉల్లాంగై కొండ నాయనార్ గా పిలువబడ్డారు. ఇది తెలుసుకున్న రామానుజులు వారి మామగారైన పెరియ తిరుమలై నంబిని, గోవింద పెరుమాళ్ ను సంస్కరించి మన సాంప్రదాయంలోకి తీసుకురమ్మని పంపుతారు. పెరియ తిరుమలై నంబి కాళహస్తికి వెళ్లి గోవింద పెరుమాళ్ ను నమ్మాళ్వార్ పాసురాలు, ఇంకా ఆళవందార్ స్తోత్రరత్నంలోని శ్లోకాలను ఉపయోగించి సంస్కరించేందుకు ప్రయత్నిస్తారు. గోవింద పెరుమాళ్ తన తప్పు తెలుసుకొని మన సాంప్రదాయంలోకి తిరిగివస్తారు. కాబట్టి పిల్లలు, ఆళవందార్ పరమపదం చేరిన తరువాత కూడా, రామానుజులు మాత్రమే కాదు వారి సోదరుడైన గోవింద పెరుమాళ్ ని కూడా మన సాంప్రదాయంలోకి తీసుకురావడానికి సాధనమైనారు.పెరియ తిరుమలై నంబి ఆచార్యులుగా గోవింద పెరుమాళ్కు  పంచ సంస్కారం చేస్తారు. పెరియ తిరుమలై నంబి గోవింద పెరుమాళ్ తో తిరుపతికి తిరిగి వస్తారు, గోవింద పెరుమాళ్ వారి ఆచార్య కైంకర్యాన్ని కొనసాగిస్తారు. ఇక్కడ, మీరు గమనించాల్సిన చాలా ముఖ్యమైన విషయం ఒకటి ఉంది. రామానుజులు మరియు పెరియ తిరుమలై నంబి గోవింద పెరుమాళ్ వద్దకు వెళ్లి సంస్కరించారే కానీ గోవింద పెరుమాళ్ వీరి వద్దకు రాలేదు, మీరిది గమనించాలి. ఇలా తమ శిష్యుల శ్రేయస్సు కోసం వారి వద్దకే వెళ్లి, ఆ శిష్యుల బాగుకోసం వారి పట్ల శ్రద్ధ కలిగి ఉండే ఆచార్యులను కృపా మాత్ర ప్రసన్నాచార్యులు అని పిలుస్తారు. వారు తమ శిష్యులను స్వచ్ఛమైన నిస్వార్థ భావంతో సమీపిస్తారు. గోవింద పెరుమాళ్కు రామానుజుల మరియు పెరియ తిరుమలై నంబిలు ఇద్దరూ కృపా మాత్ర ప్రసన్నాచార్యులు.

పరాశర: నాన్నమ్మా, గోవింద పెరుమాళ్ గురించి మాకు మరింత చెప్పండి. వారు ఏ కైంకర్యాలు చేశారు?

నాన్నమ్మ:  గోవింద పెరుమాళ్ వారి ఆచార్యులు పెరియ తిరుమలై నంబి పట్ల చూపించిన ఆచార్య అభిమాన సంఘటనలు ఎన్నో ఉన్నాయి. ఒకానొక సమయంలో, పెరియ తిరుమలై నంబి పడుకోవటానికి గోవింద పెరుమాళ్ పడక తయారుచేస్తున్నారు, వారి ఆచార్యులకన్నా ముందు ఆ పడకపై వారే పడుకుంటారు. ఈ విషయం గురించి గోవింద పెరుమాళ్ని విచారిస్తే, గోవింద పెరుమాళ్ ప్రత్యుత్తరంగా, అలా చేస్తే నరకానికి వెళ్ళినా ఫరవాలేదు కాని ఆచార్యుల పడక సురక్షితంగా సౌకర్యవంతంగా ఉండాలి అని చెబుతారు. ఇది ఆచార్య అభిమానాన్ని చూపిస్తుంది, ఇక్కడ తనను తానూ పట్టించుకోకుండా ఆచార్యుల తిరుమేనిపై శ్రద్ధ ఎక్కువ వహించారు. పెరియ తిరుమలై నంబి నుండి శ్రీ రామాయణ సారాన్ని నేర్చుకోవడానికి రామానుజులు తిరుపతికి వచ్చే సమయం ఆసన్నమైంది. ఒక సంవత్సరం పాటు నంబి నుండి నేర్చుకున్న తరువాత, తిరిగి బయలుదేరే సమయాన, నంబి రామానుజులకు ఏదైనా ఇస్తాను అడగమంటారు. రామానుజులు కైంకర్యం కోసం గోవింద పెరుమాళ్ని ఇవ్వమంటే వారు  సంతోషంగా అంగీకరిస్తారు. ఇది తెలుసుకున్న గోవింద పెరుమాళ్ తిరుమలై నంబిని విడిచిపెట్టడానికి  విచారం వ్యక్తం చేస్తారు.

వ్యాస : నాన్నమ్మా, ఎందుకు నంబి గోవింద పెరుమాళ్ను ఇస్తారు? వారి ఆచార్యులకు కైంకర్యం చేస్తూ  సంతోషంగా ఉన్నట్లయితే గోవింద పెరుమాళ్ ఎందుకు వదిలి వెళ్ళాలి?

నాన్నమ్మ: వ్యాస, గోవింద పెరుమాళ్ రామానుజుల వద్ద వివిధ కైంకర్యాలు చేస్తూ తద్వారా మన సాంప్రదాయంలో గొప్ప పాత్ర వహించాల్సి ఉంది. తన చిన్ననాటి నుండి, వారు రామానుజుల పట్ల గొప్ప ప్రేమ, అభిమానం కలిగి ఉండేవారు. రామానుజులు పరమపదానికి  చేరుకున్న తరువాత, పరాశర భట్టార్ మరియు రామానుజుల యొక్క ఇతర శిష్యులకు వారు మార్గదర్శిగా ఉంటారు. ఇన్ని బాధ్యతలు, విధులు అతని కోసం ఎదురుచూస్తున్నాయి, అతను తన ఆచార్యులైన పెరియ తిరుమలై నంబిని త్యాగం చేసి, తనకు మార్గదర్శిగా, ఉపదేశకునిగా రామానుజులను స్వీకరించాల్సిందే. తరువాత వారు రామానుజులను తన సర్వస్వంగా స్వీకరించి, రామానుజుల తిరుమేని (దైవ రూపం) యొక్క అందాన్ని వర్ణిస్తూ ఒక పాసురాన్ని వ్రాసారు. దానినే “ఎమ్బెరుమానార్ వడివళగు పాసురం” అని పిలుస్తారు. ముందు మీకు చెప్పినట్టుగా, సాంప్రదాయం విషయానికి వస్తే, మీరు ఉన్నతమైన ఉద్ధరణ కోసం ఏ త్యాగమైనా చేయటానికి సిద్ధంగా ఉండాలి. గోవింద పెరుమాళ్ కూడా అదే చేశారు.

అత్తులాయ్ :  గోవింద పెరుమాళ్ పెళ్లి చేసుకున్నారా? వారికి పిల్లలు ఉన్నారా?

నాన్నమ్మ: గోవింద పెరుమాళ్ ఎల్లప్పుడూ భగవత్ విషయంలో మునిగి ఉండేవారు. వారు ప్రతి వస్తువులో, ప్రతి ఒక్కరిలో ఎమ్బెరుమాన్ ని చూసేవారు. వారికి వివాహం అయినప్పటికీ, భగవత్ విషయంలో గోవింద్ పెరుమాళ్ యొక్క ఉన్నతమైన స్తితిని చూసి, ఎమ్బెరుమానార్ స్వయంగా గోవింద పెరుమాళ్కు సన్యాసాశ్రమ స్వీకారం చేయించి వారికి ఎంబార్ అని పేరునిస్తారు. ఎంబార్ తన ఆఖరి రోజులలో, మన అందమైన శ్రీవైష్ణవ సాంప్రదాయాన్ని ముందుకు నడుపమని పరాశర భట్టార్ని నిర్దేశిస్తారు. ఎమ్బెరుమానార్ యొక్క చరణకమలాల యందు ఎల్లప్పుడూ “ఎమ్బెరుమానార్ తిరువడిగాలే తంజం” అని ధ్యానించమని నిర్దేశిస్తారు. వారి ఆచార్యులైన రామానుజుల యొక్క చరణకమలాలను ధ్యానిస్తూ, ఆచార్యులకు తను చేసిన వాగ్దానాలు నెరవేర్చి, ఎంబార్ తన ఆచార్యుల కైంకర్యం కొనసాగించడానికి పరమపదానికి చేరుకుంటారు. భట్టార్ వారి ఆచార్యుల యొక్క అడుగుజాడల్లో నడిచి మచ్చలేని మన సాంప్రదాయ వారసత్వాన్ని కొనసాగిస్తారు.

వేదవల్లి : నాన్నమ్మా,  భట్టార్ గురించి మరింత చెప్పండి.

నాన్నమ్మ: మీరు మళ్ళీ వచ్చినప్పుడు భట్టార్ గురించి మరింత మీకు చెప్తాను. బయట చీకటి పడుతోంది ఇంటికి వెళ్లండి. గుడికి వెళ్ళడం మర్చిపోకండి ఆళవందార్ తిరునక్షత్రం రేపు.

ఆళవందార్, పెరియ తిరుమలై నంబి, రామానుజులు మరియు ఎంబార్ గురించి ఆలోచిస్తూ పిల్లలు వారి ఇళ్ళకు బయలుదేరారు.

మూలము : http://pillai.koyil.org/index.php/2016/08/beginners-guide-embar/

పొందుపరిచిన స్థానము http://pillai.koyil.org

ప్రమేయము (గమ్యము) – http://koyil.org
ప్రమాణము (ప్రమాణ గ్రంథములు) – http://granthams.koyil.org
ప్రమాత (ఆచార్యులు) – http://acharyas.koyil.org
శ్రీవైష్ణవ విద్య / పిల్లల కోసం– http://pillai.koyil.org

Leave a Reply

Your email address will not be published. Required fields are marked *