బాల పాఠము – రామానుజులు – భాగము 2

శ్రీః  శ్రీమతే శఠకోపాయ నమః  శ్రీమతే రామానుజాయ నమః  శ్రీమత్ వరవరమునయే నమః

శ్రీ వైష్ణవం – బాల పాఠము

<< రామానుజులు – భాగము 1

పరాశర, వ్యాస వేదవల్లి మరియు అత్తుళాయ్ తో కలిసి ఆండాళ్ నాన్నమ్మ ఇంటికి వస్తారు.

పరాశర: నాన్నమ్మ, నిన్న మీరు రామానుజులు మరియు వారి శిష్యుల జీవితం గురించి మాకు చెప్తానని అన్నారు.

నాన్నమ్మ: అవును. వారి శిష్యుల గురించి చెప్పడానికి ముందు, రామానుజుల గురించి ఒక ప్రత్యేక అంశాన్ని కూడా మీరు తెలుసుకోవాలి. అది రామానుజుల అవతారం గురించి, వారు భౌతికంగా జన్మించుటకు ముందే సుమారు 5000 సంవత్సరాల క్రితం నమ్మాళ్వార్ మధురకవి ఆళ్వార్ కి భవిష్యవాణి చెప్పారు, తరువాత కాలంలో నాథమునులు కూడా  తెలుసుకున్నారు. చరమోపాయ నిర్ణయం అని పిలవబడే గొప్ప గ్రంథం,  పూర్తిగా మన ఎమ్బెరుమానార్ యొక్క కీర్తిని వెల్లడిస్తుంది – ఈ పుస్తకం ఎమ్బెరుమానార్ అవతారాన్నిగురించి నమ్మాళ్వార్ – నాథమునుల సంభాషణను బహిర్గతం చేస్తుంది. ఎమ్బెరుమానార్ యొక్క దైవ స్వరూపం నమ్మాళ్వార్ చేత మధురకవి ఆళ్వారికి  సమర్పించబడిన విగ్రహం, ఆళ్వార్ తిరునగరిలో భవిష్యదాచార్య సన్నిధిలో ఇప్పటికీ పూజింపబడుతుంది.

రామానుజ – ఆళ్వార్ తిరునగరి

వ్యాస: ఓ! అయితే, ఆళ్వారులకు, కొంతమంది ఆచార్యులకు వారి జన్మ వివరాల గురించి ముందే తెలుసు. చాలా గొప్పగా ఉంది నాన్నమ్మా. వారి చరిత్రను మీరు చెప్పడం కొనసాగించండి.

నాన్నమ్మ: సరే, రామానుజులు మన దేశం యొక్క అన్ని దిశలా ప్రయాణించి వైష్ణవ తత్వశాస్త్రాన్ని ప్రచారం చేశారు. కొన్నిసార్లు సునాయాసంగా ప్రచారం చేసినా అనేక సార్లు ఎదుటివారి నుండి చాలా ప్రతిఘటన వచ్చింది, కానీ రామానుజులు తన జ్ఞానంతో మరియు ఆప్యాయతతో  ప్రజల మెప్పు పొందేవారు. వారు కాంచీపురంలో ఉన్నప్పుడు, వారి వివాహం తంజమ్మాళ్ తో జరిగింది, కానీ తరువాత  దేవపెరుమాళ్ ద్వారా సన్యాసాశ్రమం స్వీకరించారు. రామానుజులు సన్యాసాశ్రమాన్ని స్వీకరించినపుడు, ఒక్క తన మేనల్లుడైన ముదలియాణ్డాన్ ను తప్ప, వారు జీవితంలో అన్నిటిని త్యాగం చేస్తానని ప్రమాణం చేస్తారు.

వ్యాస: నాన్నమ్మా, ఎందుకు వారు వివాహం చేసుకున్న తరువాత సన్యాసాశ్రమం స్వీకరించారు? ఎందుకు వారు వివాహితులుగానే ఉండి ఆ కైంకర్యాలు చేయలేదు?

నాన్నమ్మ: వ్యాస, దీనికి అనేక కారణాలున్నాయి. ఒకటి, వారికి, వారి భార్యకు మధ్య కొన్ని అభిప్రాయ భేదాలు ఉండటం వలన, రెండు, కొన్ని గొప్ప కార్యాల కోసం కొన్ని త్యాగాలు చేయాలి, తప్పదు. వైష్ణవ సిద్ధాంతాన్ని మన దేశం నలుమూలలా ప్రచారం చేసే బాధ్యత వారి భుజంఫై ఉందని మనకందరికీ తెలిసు. ఉదాహరణకు, మన సైనికులు దేశ సరిహద్దులకు భద్రత కల్పించడం కోసం, వారి కుటుంబాలు,  వారి ప్రియమైన వారిని విడిచి ఉంటారు, ఎందుకంటే అది వారి బాధ్యత కాబట్టి. అదేవిధంగా, రామానుజుల మనస్సులో గొప్ప సంకల్పం ఉంది. వారి ఉద్దేశ్యం వేదంలోని నిజమైన సారాంశాన్ని ఉద్దరించడం అని వారికి తెలుసు . అందువల్ల వారు సన్యాసాశ్రమాన్ని స్వీకరించారు. వారు జీయర్ కాగానే, ముదలియాణ్డాన్ మరియు కూరత్తాళ్వార్ వంటి గొప్ప విద్వాంసులు రామానుజుల శిష్యులయ్యారు.

అత్తుళాయ్ : ఇంత పెద్ద బాధ్యతను చేపట్టడం ఒక భారం కాదా? ఎలా రామానుజులు అన్ని ఒంటరిగా చేశారు?

నాన్నమ్మ: కాదు అత్తుళాయ్! ఇది ఒక భారం కానే కాదు. మీరు మీ పని పట్ల మక్కువగా ఉన్నప్పుడు, అది భారంగా ఉండదు. అంతేకాక, రామానుజులు ఒంటరిగా ఎప్పుడూ లేరు. వారు ఎల్లప్పుడూ ముదలియాణ్డాన్, కూరత్తాళ్వార్, ఎంబార్, అనంతాళ్వార్, కిడాంబి అచ్చాన్, వడుగ నంబి, పిళ్ళై ఉరంగవిల్లి దాసు మొదలగు గొప్ప శిష్యులు రాత్రింబవళ్ళు వారిని చూసుకున్నారు. వీరు ఈ దిగ్విజయయాత్రలో పూర్హిగా రామానుజులతో పాటుగా వున్నారు. రామానుజులను దెబ్బతీయడానికి హత్యా ప్రయత్నాలు కూడా జరిగాయి. అలాంటి సందర్భాలలో, ఎంబార్ మరియు కూరత్తాళ్వార్ వంటి శిష్యులు తమ ఆచార్యుని రక్షించటానికి వారి ప్రాణాలన్నే పణంగా పెట్టారు. కూరత్తాళ్వార్, పెరియ నంబి శైవ చక్రవర్తి దర్బారుకి వెళ్లి వారి కంటిచూపును ఎలా కోల్పోయారో మీఅందరికి తెలుసు? చుట్టూ అటువంటి గొప్ప శిష్యులతో కూడి, అనేక దేవాలయాలలో సరైన ఆలయ వ్యవస్తని పునః స్థాపించడంలో రామానుజులు గొప్ప శ్రద్ధ తీసుకున్నారు.

రామానుజ – శ్రీరంగం

వేదవల్లి: అవును నాన్నమ్మా,  శ్రీరంగం, తిరుపతి వంటి అనేక దేవాలయాల్లో ఆలయ నియమాలు, ఆచారాలు అన్నింటినీ రామానుజులు స్థాపించారని నేను విన్నాను. దీని గురించి మాకు మరింత వివరంగా చెప్పగలరా?

నాన్నమ్మ: నిజమే వేదవల్లి. వారు కేవలం వేదాలలో పేర్కొన్న ఆచారాలను తిరిగి అమలు చేసారు. వారు ఆచారాలన్ని అమలు చేసి, వాటిని స్థాపించడంలో చాలా శ్రద్ధ తీసుకున్నారు. శ్రీరంగంలో, ఆ ఆలయాన్ని పెరియ కోయిల్ నంబి అనే పేరుతో ఒకరు సంరక్షించేవారు. ముందు నేను చెప్పినట్లుగా, ఆలయం పరిపాలనలో అవసరమైన మార్పులు చేయుటకు రామానుజులు పెరియ కోయిల్ నంబి యొక్క తక్షణ ఆమోదం పొందలేదు. శ్రీ వైష్ణవ సాంప్రదాయం గురించి పెరియ కోయిల్ నంబికి అవగాహన కల్పించడం కోసం మరియు ఆలయ పరిపాలనలో మార్పుల కోసం రామానుజులు కూరత్తాళ్వారుని పంపాల్సి వచ్చింది. పెరియ కోయిల్ నంబి కూరత్తాళ్వారి మార్గనిర్దేశం తర్వాత, రామానుజులుకు వారు శరణాగతులై  తరువాత తిరువరంగత్తు అముదనార్ అనే పేరుతో పిలువబడ్డారు . తరువాత వారు రామానుజులను ప్రశంశిస్తు రామానుజ నూత్తందాది వ్రాశారు. తిరుమల వేంకటేశ్వరుడు విష్ణుమూర్తిగా గుర్తించబడింది రామానుజుల చేతనే, ఇతర వర్గాల వారు వేరుగా ప్రతిపాదనలు చేశారని మీకు తెలుసా?

రామానుజ – తిరుపతి

పరాశర: ఏమిటి? వేంకటేశ్వర స్వామి ఎవరో కాదు సాక్షాత్ విష్ణు భగవానుడేనని మనందరికీ తెలుసు. నీకు ఆ విషయం పైన ఎప్పటినుంచి సందేహం ఉంది?

నాన్నమ్మ: అవును! తిరుమల వేంకటేశ్వర స్వామి స్వయంగా విష్ణుమూర్తియే. కానీ కొందరు వారిని వేరుగా చెప్పుకున్నారు. కొందరు ఆయన రుద్రుడని అన్నారు, మరి కొంతమంది ఆయన స్కంధుడని పేర్కొన్నారు. అటువంటి ఆరోపణలను విన్న తరువాత రామానుజులు తిరుపతికి వెళ్లారు. ఈ సంఘటనల పట్ల వారు అసంతృప్తిని వ్యక్తపరిచి, వేంకటేశ్వర స్వామి గుర్తింపుపై సత్యాన్ని స్థాపించారు, వారు శంఖ చక్రాలతో స్వయంగా శ్రీమన్ నారాయణుడే అన్న సత్యాన్ని స్థాపించారు. అలా తిరుపతిలో, ఆలయం ఆచారాలను స్థాపించటంతో పాటు రామానుజులు ఇంకొంచం ఎక్కువగా వారు వెంకటేశ్వర స్వామి యొక్క గుర్తింపునే స్థాపించారు. అందువల్ల, రామానుజులు తిరువేంకటముడయాన్ యొక్క ఆచార్యులుగా ప్రశంసించ బడ్డారు. ఇక్కడ, రామానుజులు రామాయణం యొక్క సారాంశాన్ని వారి మేన  మామయ్య పెరియ తిరుమలై నంబి నుండి నేర్చుకున్నారు. వారు ఇతర దేవాలయాలలో ఆలయ విధులు స్థాపించిగా వాటిలో తిరునారాయణపురం ఆలయం ప్రముఖమైనది.

రామానుజ – తిరునారాయణ పురం

అత్తుళాయ్: నాన్నమ్మా,  ఆ రోజుల్లో మేల్కొటె  జైనులు, రామానుజులకు సమస్యలను సృష్టించారని విన్నాను.

వ్యాస: తిరునారాయణపురం ఆలయ పెరుమాళ్ ముస్లిం ఆక్రమణదారులచే దొంగిలించబడ్డారని కూడా విన్నాను.

నాన్నమ్మ: అవును, అది నిజం. రామానుజులు దేవాలయాల యొక్క బాగు కోసం మరియు మన సాంప్రదాయ సంస్కరణలను తీసుకువచ్చేటప్పుడు అనేక కష్టాలను ఎదుర్కొన్నారు. అయితే, మార్పు మంచిదైనా చాలామంది స్వాగతించరు. ప్రతి ఒక్కరూ పాత ఆచారాలే సురక్షితంగా భావిస్తారు, సరియైనా కాకపోయినా మార్పును వారు అంగీకరించరు, చాలా అవసరమైన మార్పు తీసుకురావాలనే వ్యక్తిని స్వాగతించరు. ఇది సమాజంలో సాధారణ వైఖరి. ఈకాలంలో మార్పు చాలా కష్టం, 1000 సంవత్సరాల క్రితం ఊహించండి, ఆచారాలు మరియు నమ్మకాలు దృఢంగా ఉన్నప్పుడు, రామానుజులు సానుకూల ఫలితాన్ని తీసుకురావడానికి ముందు చాలా ప్రతిఘటన ఎదుర్కోవలసి వచ్చింది. జైన పండితులు విశిష్టాద్వైత తత్వశాస్త్రం యొక్క శాశ్వత నిజాన్ని అంగీకరించడానికి ఇష్టపడలేదు. 1000 జైన మేధావులు ఏకకాలంలో తమ 1000 ప్రశ్నలకు రామానుజులు సమాధానమివ్వాలని సవాలు చేసారు. రామానుజులు వారి అసలు రూపంతో – ఆదిశేషునిలాగా 1000 పడగలతో ఏకకాలంలో వారి ప్రశ్నలకు సమాధానాలు ఇచ్చి  తద్వారా చర్చలో గెలుపు పొందుతారు .

తిరునారాయణపురం ఆలయ ఉత్సవ మూర్తియైన సెల్వప్పిళ్ళై, ముస్లిం ఆక్రమణదారులచే దొంగిలించబడి ఆ ఆక్రమణదారుల కుమార్తె యొక్క గృహంలో ఉంటుంది , ఆమె సెల్వప్పిళ్ళై పట్ల ప్రేమతో ఆప్యాయతతో ఉండేది. సెల్వప్పిళ్ళైను రక్షించడానికి రామానుజులు వచ్చినప్పుడు, ఆమె  సెల్వప్పిళ్ళై విరహాన్ని భరించలేకపోయింది.

అత్తుళాయ్: ఎలాగైతే ఆండాళ్ కృష్ణుని విరహాన్ని భరించలేకపోయింది, అలాగ!

నాన్నమ్మ: అవును, సరిగ్గా ఆండాళ్ లాగానే. ముస్లిం ఆక్రమణదారుల కుమార్తె సెల్వప్పిళ్ళైను రామానుజులతో పంపే ఆలోచనను భరించలేకపోయింది. చివరికి, రామానుజులు ముస్లిం రాజు కుమార్తె మరియు సెల్వప్పిళ్ళైల  యొక్క వివాహం చేస్తారు. నిజమైన భక్తి మతానికి మించినది అని ఇక్కడ నిరూపించబడింది.

కూరత్తాల్వారు – రామానుజ – ముదలియాన్డాన్

వ్యాస: నాన్నమ్మా, ఎలా రామానుజులు ఆళవందార్ 3 కోరికలను నేరవేరుస్తారో మీరు చెప్పలేదు .

నాన్నమ్మ: ఇద్దరు పిల్లలతో కూరత్తాళ్వార్ దీవించబడ్డారు. రామానుజులు వారిద్దరికి వ్యాస మరియు పరాశరగా నామకరణం చేసి తద్వారా ఇద్దరు ఋషుల గొప్పతనాన్ని గుర్తించి ఆళవందార్ మొట్టమొదటి వాగ్దానాన్ని నెరవేర్చారు. ఎంబార్ గా పిలువబడే గోవింద భట్టార్ కి, సిరియ గోవింద పెరుమాళ్ అని పిలవబడే ఒక చిన్న సోదరుడు ఉండేవారు, అతని కుమారుడికి నమ్మాళ్వార్ మరో పేరైన పరాంకుశనంబిగా నామకరణం చేసి, తద్వారా రెండవ వాగ్దానం నెరవేర్చారు. చివరకు, వారు మూడవ వాగ్దానాన్ని నెరవేర్చడానికి శ్రీ భాష్యాన్ని రాశారు. శ్రీ భాష్యాన్ని రాయడానికి, రామానుజులు కూరత్తాళ్వార్  తో కష్మీరుకి వెళతారు.

వేదవల్లి: కష్మీరులో ఏమి జరిగింది?

నాన్నమ్మ: శ్రీ భాష్యాన్ని వ్రాయడానికి గతంలో వ్రాసిన గ్రంథం పొందడానికి రామానుజులు కష్మీర్కి వెళతారు. వారు ఆ గ్రంథాన్ని పొందిన తరువాత , అక్కడ ఉన్న కొంతమంది దుష్టులు, రామానుజులు తన సొంత ప్రయోజనం కోసం తమ సంగ్రహాలయం నుండి వారి గ్రంథాన్ని తీసుకువెళ్తున్నారను కొని, ఆ ఆలోచనను భరించలేక వారు రామానుజులను అనుసరిస్తూ, ఆ గ్రంథాన్ని రామానుజుల దగ్గర నుండి  లాగేసుకుంటారు.

వ్యాస: ఎంత దారుణం!

నాన్నమ్మ: అవును! అయినప్పటికీ, ఆ దుష్టుల చేతులు ఆ గ్రంథంపై పడే ముందే, కూరత్తాళ్వార్ సంపూర్ణ గ్రంథాన్ని, రచనకు అవసరమైన విషయాలను కంఠస్తం చేసేసుకుంటారు.

వ్యాస: మొత్తం గ్రంథం కంఠస్తం చేసుకున్నారా? అది ఎలా సాధ్యమవుతుంది నాన్నమ్మా? నేను కూడా నా పాఠ్య పుస్తకాలను అలా కంఠస్తం చేసుకుంటే ఎంత బాగుండో!

నాన్నమ్మ (నవ్వుతూ): కూరత్తాళ్వార్ రామానుజులకు కేవలం శిష్యులే కాదు, వారు రామానుజులకు ఒక గొప్ప వరం. రామానుజుల అనుబంధంతో ప్రతి ఒక్కరూ ఉద్ధరింప బడుతూ ఉంటే, వారు తన సహచరుడైన కూరత్తాళ్వార్ తో ఉద్ధరింపబడ్డారని రామానుజులు స్వయంగా చెప్పారు. అటువంటి ఒక గొప్ప విద్వాంసుడైనప్పటికీ, రామానుజుల నివాసమైన కూరత్తాళ్వార్ స్వచ్ఛమైన హృదయంలోకి  అహంకారం కొంచం కూడా రాలేదు. కూరత్తాళ్వార్ సహాయంతో, శ్రీ భాష్యం రచన పూర్తిచేసి తద్వారా ఆళవందార్కు చేసిన చివరి వాగ్దానాన్ని కుడా నెరవేర్చారు. శ్రీరంగాన్ని పాలిస్తున్న శైవ రాజు మరణించిన తరువాత, రామానుజులు శ్రీరంగానికి తిరిగివస్తారు.

చివరగా, ఈ ప్రపంచాన్ని వదిలి పరమపదానికి చేరుకోవడానికి ముందు, రామానుజులు తన తదుపరి మన సాంప్రదాయాన్ని నడుపుటకు కూరత్తాళ్వార్ కుమారుడైన పరాశర భట్టార్ని ఆచార్యునిగా నిర్ణయిస్తారు. భట్టార్ మరియు ఇతర శిష్యులకు ఎంబార్ ని ఆశ్రయించి వారి మార్గదర్శకత్వంలో నేర్చుకోమని నిర్దేశిస్తారు. వారు తన శిష్యులందరికీ తనతో వారందరూ ఎలా వ్యవహరించారో అదేవిధంగా భట్టార్తో కూడా వ్యవహరించాలని నిర్దేశిస్తారు. సాంప్రదాయంలోకి  రామానుజులను తీసుకురావటానికి ఆళవందారు పెరియ నంబిని నియమించిన మాదిరిగా, రామానుజులు నంజీయర్ను సాంప్రదాయంలోకి తీసుకురామని భట్టార్ కి  చెబుతారు. ఎమ్బెరుమానార్ వారి ఆచార్యులైన పెరియ నంబి మరియు ఆళవందార్ని ధ్యానిస్తూ ఈ ప్రపంచాన్ని వదిలి శ్రీమన్నరాయణుని నిత్య నివాసంలో తన కైంకర్యాన్ని కొనసాగించడానికి పరమపదానికి చేరుకుంటారు. రామానుజుల విరహం భరించలేక త్వరలో ఎంబార్ కూడా పరమపదాన్ని అధిరోహిస్తారు.

పరాశర: నాన్నమ్మా, రామానుజుల యొక్క శరీరం ఇప్పటికీ శ్రీరంగం లో సంరక్షించబడినది అని విన్నాను. అది నిజమా?

నాన్నమ్మ: అవును పరాశర, అది నిజం, మనం గొప్ప ఆచార్యుల గురించి మాట్లాడేటప్పుడు, తిరుమేని అని అంటాం, ఎలాగైతే  గౌరవంతో పెరుమాళ్ని సంబోధిస్తామో అలాగే. శ్రీరంగం ఆలయం లోపల రామానుజుల సన్నిధి క్రింద తిరుమేనిని భద్ర పరిచారన్నది నిజం. ఈ రోజు మనం చూస్తున్న  రామానుజుల సన్నిధి ఒక సమయంలో శ్రీరంగనాథుని వసంత మండపంగా ఉండేది. ఇప్పుడు, మనం రామానుజుల చరణారవిందములకు మరియు శ్రీరంగనాథునికి, మన ఆచార్యుల గురించి వారి కీర్తిప్రతిష్టల గురించి మరింత తెలుసుకోవడానికి మనకు ఆసక్తిని మరియు ప్రమేయంని ప్రసాదించమని ప్రార్థన చేద్దాం. ఇప్పటికే ఆలస్యమైయింది మీరు అందరూ ఇంటికి వెళ్ళండి. మళ్ళీ కలుసుకున్నప్పుడు రామానుజుల శిష్యుల గురించి వారి కీర్తిప్రతిష్టల గురించి మరియు రామానుజుల ఈ విజయయాత్రలో వారి సహకారం గురించి చెబుతాను .

పిల్లలు రామానుజుల గురించి, వారి వివిధ కైంకర్యాలు, వారు ఎదుర్కొన్న అనేక ఇబ్బందుల గురించి  మరియు వారు మన సాంప్రదాయపు గొప్ప ఆచార్యులుగా ఎలా ఉద్భవించారో ఆలోచిస్తూ వారి ఇంటికి వెళ్ళారు.

మూలము : http://pillai.koyil.org/index.php/2016/08/beginners-guide-ramanujar-2/

పొందుపరిచిన స్థానము http://pillai.koyil.org

ప్రమేయము (గమ్యము) – http://koyil.org
ప్రమాణము (ప్రమాణ గ్రంథములు) – http://granthams.koyil.org
ప్రమాత (ఆచార్యులు) – http://acharyas.koyil.org
శ్రీవైష్ణవ విద్య / పిల్లల కోసం– http://pillai.koyil.org

Leave a Reply

Your email address will not be published. Required fields are marked *