బాల పాఠము – నంపిళ్ళై

శ్రీః  శ్రీమతే శఠకోపాయ నమః  శ్రీమతే రామానుజాయ నమః  శ్రీమత్ వరవరమునయే నమః

శ్రీ వైష్ణవం – బాల పాఠము

<<బాల పాఠము – నంజీయర్

పరాశర, వ్యాస, వేదవల్లి మరియు అత్తుళాయ్ తో కలిసి ఆండాళ్ నాన్నమ్మ ఇంటికి వస్తారు.

నాన్నమ్మ : పిల్లలూ స్వాగతం. ఈ రోజు మనం నంజీయర్ యొక్క శిష్యులైన ఆచార్య నంపిళ్ళై గురించి మాట్లాడుకుందాం. నేను మునుపు మీకు చెప్పినట్లుగా, వరదరాజుగా నంబూర్లో జన్మించిన నంపిళ్ళై తమిళ, సంస్కృత భాషలయందు మరియు సాహిత్యంలో పండితులు. నంజీయర్ తన 9000 పడి వ్యాఖ్యానాన్ని కాపీలు చేయడానికి, ఈ రెండు భాషల్లో నైపుణ్యత కారణంగా వరదరాజు పేరు  ఎలా సిఫార్సు చేయబడిందో మనందరికీ తెలుసు. నంజీయర్వారే  వరదరాజుని వారి నిజమైన సామర్థ్యాన్ని చూసి అర్థం చేసుకున్న తరువాత నంపిళ్ళై అన్న పేరు పెట్టారు. నంపిళ్ళైని తిరుక్కలికన్రి దాసు , కలివైరి దాసు, లోకాచార్య, సూక్తి మహార్ణవ, జగదాచార్యార్ మరియు ఉలగాసిరియ అని కూడా పిలుస్తారు.

నంపిళ్ళై – తిరువల్లిక్కేని

వ్యాస: నాన్నమ్మా, నంపిళ్ళై ఎలా  కావేరి వరదలో వారి ఆచర్యులిచ్చిన గ్రంథం కొట్టుకుపోయిన తరువాత వారి జ్ఞాపకశక్తితో మొత్తం 9000 వ్యాఖ్యానాన్ని తిరిగి వ్రాసారో మాకు గుర్తుంది.

నాన్నమ్మ : అవును, అంతటి గొప్పతనం మరియు జ్ఞానం ఉన్నప్పటికీ, నంపిళ్ళై చాలా వినయంగా ఉండేవారు. ప్రతి ఒక్కరి పట్ల ప్రేమ, గౌరవంతో ఉండేవారు.

వేదవల్లి: నాన్నమ్మా, నంపిళ్ళై గొప్పతనాన్ని చాటిచెప్పే సంఘటనలు కొన్ని మాకు చెప్తారా?

నాన్నమ్మ : నంజీయర్ వద్ద పాసురాలు, వాటి అర్ధాలు నేర్చుకున్న తరువాత నంపిళ్ళై  శ్రీరంగంలో పెరుమాళ్ సన్నిధికి తూర్పు వైపున క్రమం తప్పకుండా ప్రసంగించేవారు. తమిళం మరియు సంస్కృత భాషల్లో, వాటి సాహిత్యంలో వారికి ప్రావీణ్యం ఉన్న కారణంగా నంపిళ్ళై పెద్ద సమూహాన్ని ఆకర్షించే వారు. వినేవారికి సందేహాలు / ప్రశ్నలు తలెత్తుతున్నప్పుడల్లా వాల్మీకి రామాయణాన్ని ఉపయోగించి సంతృప్తికరమైన జవాబులు ఇవ్వడంలో కూడా వారు నిపుణులైనారు. ఒకసారి, నంపిళ్ళై ప్రసంగిస్తున్నపుడు, పెరియ పెరుమాళ్ (శ్రీరంగం లోని మూలవరులు) తన శయనావస్థ నుండి నిలబడి, నంపిళ్ళై ఇస్తున్న ప్రసంగాన్ని చూడటానికి ప్రయత్నిస్తారు. తిరువిళక్కు పిచ్చన్  (సన్నిధిలో దీపాలను మరియు వాటిని వెలిగించే సేవ చేసే ఒక శ్రీవైష్ణవుడు) పెరియ పెరుమాళ్ నిలబడివుండుటను చూసి, అర్చావతారంలో వారికి కదిలేందుకు వీలులేదని వారిని తిరిగి శయనించమని కోరతారు. ఎమ్బెరుమాన్ వారిచ్చిన ప్రమాణాన్ని (అర్చావతారంగా కదలనని, మాట్లాడానని) కూడా లెక్కచేయకుండా నంపిళ్ళై ప్రసంగానికి ఆకర్షితులైనారు. అంత ఆకర్షణీయకంగా ఉండేది నంపిళ్ళై యొక్క ప్రసంగం. తమిళం మరియు సంస్కృత సాహిత్యంలో వారికున్న లోతైన జ్ఞానం కారణంగా ప్రసంగం వినేవారిని మంత్రముగ్ధులను చేయగలిగేవారు. వారు జనాలను ఎలా  ఆకర్షించేవారంటే, ఊరెరిగింపులో నంపెరుమాళ్ వయ్యారి నడకకు, వారి అందమైన తిరుమేని దర్శనానికి ఎలా ప్రపంచంలోని అన్ని ప్రాంతాల నుండి భక్తులు ఆకర్షితులౌతారో అలా.  ఎవరైనా శ్రీరంగంలో నంపెరుమాళ్ ఊరెరిగింపు చూసారా?

పెరుమాళ్ సన్నిధిలో నంపిళ్ళై ఉపన్యాసం – శ్రీరంగం

అత్తుళాయ్ : నాన్నమ్మా, నేను చూసాను. శ్రీ రంగంలో భ్రహ్మోత్సవాల సమయంలో ఒక సారి వెళ్ళాము,  పెరుమాళ్ని తిరుమాడవీధుల్లో ఉరేగిస్తుంటే వారి నడకను చూసాను.  చాలా బావుంటుంది.

పరాశర: అవును నాన్నమ్మా, మేము కూడా చాలా సార్లు  నంపెరుమాళ్ ఊరెరిగింపు చూశాము.

నాన్నమ్మ : ఎవరు చూసుండరు? కళ్ళకి కట్టినట్టుగా ఉంటుంది కదూ? ఎలాగైతే నంపెరుమాళ్ ఊరెరిగింపుతో తన భక్తులను ఆకర్షించేవారో , నంపిళ్ళై కూడా తన ఉపన్యాసాలతో అందరిని ఆకర్షించేవారు. అయినప్పటికీ, వారి వినయం అసమానమైనది. ఒకసారి నంపెరుమాళ్ ముందు, కందాడై తొళప్పర్ (ముదలియాన్డాన్ వంశస్తులు) నంపిళ్ళైని కొన్ని కఠినమైన కేకలు వేస్తారు. నంపిళ్ళైని పొగడలేక, కేకలు వేస్తారు. నంపిళ్ళై ఒక్క మాట కూడా ఎదురు చెప్పకుండా, అవమానాన్ని మింగేసి, వారి తిరుమాళిగకి (ఇంటికి) వెళ్లిపోతారు.

తొళప్పర్ తన తిరుమాళిగకి (ఇంటికి) వెళ్ళినప్పుడు, వారి భార్యకి అప్పటికే ఇతరుల నుండి వచ్చిన వార్తను విని, అతన ప్రవర్తన తప్పని బలంగా సలహా ఇచ్చి, నంపిళ్ళై యొక్క ప్రతిష్టతను వివరిస్తుంది. వారిని వెళ్ళి నంపిళ్ళై చరణకమలాల యందు పడి  క్షమాపణ వేడుకోమని ఆమె నొక్కి చెబుతుంది. చివరకు వారు చేసిన పొరపాటును తెలుసుకొని నంపిళ్ళై  తిరుమాళిగకి నడిరాత్రైనా సరే వెళ్లాలని  నిర్ణయించుకుంటారు. వారు వెళదాం అని తలుపు తెరిచినప్పుడు, బయట ఒక వ్యక్తి నిలబడి ఉన్నట్టు   గమనిస్తారు, వారు ఎవరో కాదు స్వయంగా నంపిళ్ళై వారే. తొళప్పర్ని చూసి నంపిళ్ళై వెంటనే కిందపడి వారికి దండంపెట్టి, వారితో ఏదైనా తప్పు జరిగి వారిని బాధపెట్టినట్లయితే క్షమించమని అడుగుతారు. నంపిళ్ళై గొప్పతనాన్ని చూసి తొళప్పర్ ఆశ్చర్యపోతారు  – పొరపాటు  తొళప్పర్ది అయినప్పటికీ, నంపిళ్ళై తప్పును తనపైకి తీసుకొని క్షమించమని అడుగుతారు. తొళప్పర్ వెంటనే వారికి సాష్టాంగప్రణామాన్ని సమర్పించి ఇకపై నంపిళ్ళై వారి గొప్ప వినయం వలన “లోకాచార్య” (ప్రపంచానికే గురువు) అని పిలవబడతారు అని అంటారు. అటువంటి గొప్ప వ్యక్తిత్వం, అయినప్పటికీ ఇంత వినమ్రతతో ఉన్న వారు కొందరు మాత్రమే ఉంటారు,  ఆ స్థానానికి సరిగ్గా సరిపోతారు. తొళప్పర్ ద్వేషాన్ని విడిచి అతని భార్యతో పాటు  నంపిళ్ళై సేవ చేయడం ప్రారంభిస్తారు మరియు వారి నుండి శాస్త్ర  అర్థాలను కూడా నేర్చుకుంటారు.

పరాశర: ఎంత అద్భుతంగా ఉంది!  కఠినంగా మాట్లాడిన వ్యక్తికి పరాశర భట్టార్ వారు ఖరీదైన శాలువను  బహుమతిగా ఇచ్చిన సంఘటన లాగా ఉంది.

నాన్నమ్మ : బాగా పరిశీలించావు పరాశర! మన పూర్వాచార్యులందరూ ఒకే విధమైన లక్షణాలను కలిగి ఉండేవారు – నిజమైన శ్రీవైష్ణవునిలా. సమయా సమయాన మన ఆచార్యాలు ఒక శ్రీవైష్ణవుడు స్వచ్ఛమైన జీవితాన్ని ఎలా గడపాలో, ప్రతి ఒక్కరితో ఎలా వ్యవహరించాలో నేర్పుతూనే వచ్చారు, నొక్కిచెబుతూనే ఉన్నారు. మంచి ఉదాహరణగా వారు మనకు మార్గం చూపించారు. వారి గ్రంథాలలో సిద్ధాంతంగానే కాకుండా, ఆచరణాత్మకమైనది అని అనుసరించవచ్చని కూడా వారు మనకు చూపించారు. కావలసింది ఆచార్యుల ఆశీర్వాదం మరియు కొంచం మన కృషితో, మనం కూడా పూర్వాచార్యుల జీవితాన్ని గడపడానికి ప్రయత్నించవచ్చు. చిన్న చిన్న అడుగులు వేసి చివరికి మన గమ్యానికి చేరుకోవచ్చు.

నిజమైన శ్రీవైష్ణవుడు ఎలా ఉండాలో భట్టార్ మనకు చూపించిన తరువాత, నడువిల్ తిరువీధి పిళ్ళై భట్టార్, పరాశర భట్టార్ వంశంలో వచ్చారు, వారు నంపిళ్ళై అంటే అసూయ పడేవారు. ఒకసారి నడువిల్ తిరువీధి పిళ్ళై భట్టార్ వారు పింభళగియ పెరుమాళ్ జీయర్ తో కలసి రాజ భవనానికి వెళ్ళారు . రాజు వారిద్దరిని ఆహ్వానించి, వారికి తగిన సంభావనలు ఇచ్చి ఆసనమిచ్చి ఆసీనులు కామన్నారు. శ్రీ రామాయణం నుండి రాజు ఒక ప్రశ్న అడిగారు, “శ్రీ రాముడు ఎప్పుడూ తనను తాను సామాన్య మానవునిగా  ప్రకటించుకున్నారు, పరమాత్మునిగా ఎప్పుడూ చూపించుకోలేదు, అలాంటప్పుడు వారు జటాయువుకి మోక్షాన్ని ఇస్తానని ఎలా చెప్పారు”? నంపిళ్ళై అయితే ఈ ప్రశ్నకి సమాధానం ఎలా వివరించే వారు అని భట్టార్ జీయర్ని అడుగుతారు. జీయర్ వెంటనే ఈ విధంగా వ్యాఖ్యానించి ఉండేవారని వెంటనే అంటారు, ” రాముని వంటి ధర్మాత్ముడు తన ధార్మిక శక్తితో అన్ని లోకాలను జయించగలరు” అని అంటారు. రాజు ప్రశ్నకు సమాధానమివ్వటానికి అదే వివరణను భట్టార్ ఉపయోగిస్తారు. రాజు ఆ వివరణతో ఎంతో సంతోషంచి, భట్టార్ జ్ఞానాన్ని ప్రశంశిస్తూ వారికి భారీ సంపదను బహుమానంగా సమర్పిస్తారు. భట్టార్  వెంటనే నంపిళ్ళై యొక్క వివరణ, దాని శక్తిని గ్రహించి, నంపిళ్ళై ఇంటికి వెళ్లి బహుమానంగా తీసుకున్న సంపదను వారికి సమర్పిస్తారు. అంతే కాకుండా వారు నంపిళ్ళై శిష్యులై నిరంతరం వారికి సేవ చేశారు. అలా నడువిల్ తిరువీధి పిళ్ళై భట్టార్ విమోచనముచేయబడి, నంపిళ్ళై అనేకమంది శిష్యులలో ఒకరవుతారు.

వేదవల్లి: నాన్నమ్మా, భట్టార్ మరియు నంజీయర్  మధ్య గొప్ప సంభాషణలు జరిగేవని క్రిందటిసారి మీరు  చెప్పారు. నంజీయర్ మరియు నంపిళ్ళై మధ్య కూడా అలాగే ఆసక్తికరమైన సంభాషణలు జరిగేవా?

నాన్నమ్మ : అవును వేదవల్లి. నంజీయర్ మరియు నంపిళ్ళై మధ్య అద్భుతమైన సంభాషణలు జరిగేవి. ఒకసారి, నంపిళ్ళై నంజీయర్ని ఇలా అడుగుతారు, ” ఎమ్బెరుమాన్ అవతారాలు తీసుకోవడంలో ప్రయోజనం ఏమిటి?”. నంజీయర్ ప్రత్యుత్తరంగా ” ఎమ్బెరుమాన్ , భాగవతాపచారం చేసిన వారిని తగినట్టుగా శిక్షించాలనేదే వారి  అవతార ప్రధాన ఉద్దేశ్యం”. ఉదాహరణకి, కృష్ణావతారం తీసుకోవడంలో వారి ఉద్దేశ్యమేమిటంటే, వారి భక్తులపైన ఎన్నో అపచారాలు చేసిన దుర్యోధనుడిని చివరకు శిక్షించాలనేదే. భక్త ప్రహ్లాదుని బాధపెట్టిన హిరణ్యకశిపుడిని చంపడానికి నారసింహునిగా వచ్చారు. అందువల్ల, భాగవత సంరక్షణమే అన్ని అవతారాల ప్రధాన ఉద్దేశ్యం.

వ్యాస: నాన్నమ్మా, భాగవత అపచారం అంటే ఏమిటి?

నాన్నమ్మ: నంజీయర్ చెబుతారు, మనం ఇతర శ్రీవైష్ణవులకు సమానమనే భావనే భాగవత అపచారం.  వారి జన్మ, జ్ఞానం మొదలైన వాటికి సంబంధం లేకుండా ఎప్పుడూ అందరు శ్రీవైష్ణవులని మన కంటే ఎక్కువగా భావించి వ్యవహరించాలని నంజీయర్ వివరిస్తున్నారు. ఆళ్వారులు, ఇతర పూర్వాచార్యుల  లాగా ఇతర భాగవతులను నిరంతరం కీర్తించే ప్రయత్నం మనం చేయాలి అని కూడా అంటారు. 

ఇతర దేవ-దేవతల భజన, ఇతర దేవతాంతర ప్రార్థన నిరర్థకమైనదని  నంపిళ్ళై  స్పష్టంగా చెబుతారు.

అత్తుళాయ్ : నాన్నమ్మా, నంపిళ్ళై దానిని ఎలా వివరించారు?

నాన్నమ్మ : ఒకసారి ఒకరు వచ్చి నంపిళ్ళైని అడుగుతారు , “మీ నిత్య కర్మలలో దేవతాంతరులను (ఇంద్రుడు, వరుణుడు, అగ్ని, సూర్యుడు తదితరాలను) పూజిస్తున్నారు, కాని ఎందుకు మీరు దేవాలయాలలో పూజించరు?” అని అడిగారు. నంపిళ్ళై  తక్షణమే తెలివైన సమాధానం ఇస్తారు. నంపిళ్ళై వారిని ప్రశ్న ఒకటి అడుగుతారు, “మీరు యజ్ఞ యాగాలలో అగ్నిని పూజిస్తారు స్మశానంలో అదే అగ్నికి దూరంగా ఉంటారా? అదే విధంగా, నిత్యా కర్మలను భగవదారాధనంగా  (భగవన్ యొక్క ఆరాధన) నిర్వర్తించాలని, ఆ భగవానుడు అన్ని దేవతలలో అంతర్యామిగా ఉన్నాడన్న భావనతో మనం చేస్తాము. శాస్త్రము కూడా ఇదే చెప్తుంది ఎమ్బెరుమాన్నే పూజించాలని, ఆ కారణంగా  మేము ఇతర దేవాలయాలకు వెళ్లము.

వేదవల్లి: నాన్నమ్మా, ఇది చాలా సున్నితమైన విషయమని అందరూ ఈ ఆలోచనను అంగీకరించరని మా అమ్మ చెప్పింది.

నాన్నమ్మ : నిజము చెప్పినపుడు, దానిని గ్రహించి, దానిని అంగీకరించని వారికి ఆ నిజము చేదు మందులాగా ఉంటుంది. అయితే, చేదు మందులు శరీరానికి మంచి చేస్తాయి, అలాగే ఈ నిజం కూడా ఆత్మ మరియు శరీరానికి మంచే చేస్తుంది. ప్రజలు అంగీకరించట్లేదని వైదిక నిజాల యొక్క ప్రామాణికతను ఖండించి వాటిని నిరర్ధకమని నిరూపించకూడదు. ఆచార్యుల ఆశీర్వాదాలతో, భగవంతుని అపారమైన కరుణతో దయతో  ప్రతిఒక్కరూ చివరికి ఈ నిజం తెలుసుకుంటారు. ఆళ్వార్ వారి ఒక పాసురంలో చెబుతూ అన్నారు, “ప్రతి ఒక్కరూ శ్రీమన్నారాయణుని యొక్క ఆధిక్యత యొక్క శాశ్వతమైన నిజాన్ని గుర్తించి, మోక్షానికి చేరుకున్నట్లయితే, భగవానునికి వారి దివ్య కాలక్షేపం కోసం  ఆడుకోవటానికి ప్రపంచం ఉండదు, అందుకే ఈ ఆలస్యం”. “ఈ చిట్కాని గ్రహించి, వెంటనే తిరుక్కురుగూర్ కి పరిగెత్తుకొని వెళ్లి, ఆధిప్పిరాన్ పెరుమాళ్ యొక్క చరణ కమలాల యందు శరణాగతి చేయండి” అని కూడా ఆళ్వార్ అన్నారు.

వ్యాస: నాన్నమ్మా, నంపిళ్ళైకి వివాహం అయ్యిందా?

నాన్నమ్మ : అవును, నంపిళ్ళైకి ఇద్దరు భార్యలు ఉన్నారు. ఒకసారి వారిలో ఒక భార్యను తన గురించి ఆమె ఎలా భావిస్తుందని వారు అడుగుతారు. ఆమె నంపిళ్ళైని ఎమ్బెరుమాన్ అవతారంగా తన ఆచార్యులుగా భావిస్తుందని చెప్తుంది. నంపిళ్ళై చాలా ఆనందపడి ఆమెను నంపిళ్ళైని సందర్శించే శ్రీవైష్ణవుల తదీయారాదన కైంకర్యాన్ని చేపట్టమని అంటారు. ఈ సంఘటనలో నంపిళ్ళై యొక్క ఆచార్య అభిమాన (గౌరవం) ప్రాముఖ్యతను చూపించారు.

పరాశర : నాన్నమ్మా, నంపిళ్ళై జీవితం వినడానికి చాలా ఆసక్తికరంగా ఉంది. వారు గొప్ప శిష్యులను  కలిగి ఉండాలి!

నాన్నమ్మ : అవును పరాశర! నంపిళ్ళైకి చాలా మంది శిష్యులు ఉన్నారు, వారిలో ఆచార్య పురుష కుటుంబాలకు చెందిన శిష్యులు కూడా ఉన్నారు, వీరి కాలాన్ని శ్రీరంగంలో నల్లడిక్కాలం (మహత్తరమైన కాలం) గా అందరూ కీర్తించేవారు. నంపిళ్ళై మన సాంప్రదాయంలో రెండు అద్భుతమైన స్తంభాలకు పునాది వేసారు – పిళ్ళైలోకాచార్య మరియు అళగియ మణవాళ పెరుమాళ్ నాయనార్, వీరిద్దరూ వడక్కు తిరువీధిపిళ్ళై కుమారులు. నంపిళ్ళై ప్రముఖ శిష్యులు వడక్కు తిరువీధిపిళ్ళై, పెరియవాచ్చాన్  పిళ్ళై, పింభళగరాం పెరుమాళ్ జీయర్, కందాడై తోళప్పర్, ఈయున్ని మాధవ పెరుమాళ్, నడువిల్ తిరువీధిపిళ్ళై భట్టర్ మొదలైనవారు.

nampillai-pinbhazakiya-perumal-jeer-srirangam

పింభళగరాం పెరుమాళ్ జీయర్తో నంపిళ్ళై – శ్రీరంగం

మనము మళ్ళీ కలుసుకున్నపుడు, నంపిళ్ళై  యొక్క శిష్యుల గురించి చెప్తాను, తన అనంతమైన కరుణతో, గొప్ప గ్రంథాలను అందించి మరియు మన సాంప్రదాయానికి అద్భుతమైన కైంకర్యాలను చేసారు.

పిల్లలు నంపిళ్ళై యొక్క అద్భుతమైన జీవితం మరియు అతని బోధనల గురించి ఆలోచిస్తూ వారి ఇంటికి వెళ్ళిపోతారు.

మూలము : http://pillai.koyil.org/index.php/2016/08/beginners-guide-nampillai/

పొందుపరిచిన స్థానము http://pillai.koyil.org

ప్రమేయము (గమ్యము) – http://koyil.org
ప్రమాణము (ప్రమాణ గ్రంథములు) – http://granthams.koyil.org
ప్రమాత (ఆచార్యులు) – http://acharyas.koyil.org
శ్రీవైష్ణవ విద్య / పిల్లల కోసం– http://pillai.koyil.org

Leave a Reply

Your email address will not be published. Required fields are marked *